By ក្រសួងរតនាគារសហរដ្ឋអាមេរិក ក្រោមការដឹកនាំរបស់រដ្ឋមន្ត្រីលោក Scott Bessent បានប្រកាសបង្កកទ្រព្យសម្បត្តិរូបិយប័ណ្ណគ្រីបតូ (cryptocurrency) សរុបទឹកប្រាក់ជាង ៣៤៤ លានដុល្លារអាមេរិក ដែលមានទំនាក់ទំនងជាមួយប្រទេសអ៊ីរ៉ង់។ នេះជាវិធានការដាក់សម្ពាធបន្ថែមលើទីក្រុងតេហេរ៉ង់ ខណៈវិបត្តិថាមពលសកលកំពុងតានតឹងដោយសារសង្គ្រាមមជ្ឈិមបូព៌ា។
រូបភាព៖ Reuters
ការប្រកាសនេះធ្វើឡើងកាលពីថ្ងៃសុក្រ ទី២៤ ខែមេសា ឆ្នាំ២០២៦ ខណៈលោក Bessent បានសរសេរតាមរយៈបណ្តាញសង្គម X ថាក្រសួងនឹងបន្តធ្វើឱ្យខូចសមត្ថភាពទីក្រុងតេហេរ៉ង់ក្នុងការបង្កើត និងបញ្ជូនមូលនិធិត្រឡប់ចូលប្រទេសជាប្រព័ន្ធ។
ព្រឹត្តិការណ៍នេះកើតឡើងចំពេលដែលបេសកជនអាមេរិក Steve Witkoff និង Jared Kushner ត្រៀមធ្វើដំណើរទៅប៉ាគីស្ថាន ដើម្បីចរចាជុំថ្មីជាមួយអ៊ីរ៉ង់ស្តីពីការបញ្ចប់ជម្លោះ។ បច្ចុប្បន្នទីផ្សារថាមពលពិភពលោកកំពុងជាប់គាំង ដោយសារអ៊ីរ៉ង់បិទច្រកសមុទ្រ Hormuz ដែលជាផ្លូវដឹកជញ្ជូនប្រេងដ៏សំខាន់បំផុតមួយរបស់ពិភពលោក។
ប្រែសម្រួល៖ ណឺ មិនា
