By ភ្នំពេញ៖ ករណីគ្រោះថ្នាក់ចរាចរណ៍មួយបានកើតឡើងកាលពីវេលាម៉ោង ១១:២០ យប់ថ្ងៃទី២៣ ខែមេសា ឆ្នាំ២០២៦ នៅតាមបណ្ដោយផ្លូវជាតិលេខ១ ក្នុងសង្កាត់និរោធ ខណ្ឌច្បារអំពៅ រាជធានីភ្នំពេញ ដែលបណ្ដាលឱ្យរថយន្តចំនួនពីរគ្រឿងរងការខូចខាតយ៉ាងដំណំ ប៉ុន្តែសំណាងល្អមិនមានអ្នករងរបួសធ្ងន់ឡើយ។
តាមប្រភពពីកន្លែងកើតហេតុបានឱ្យដឹងថា មុនពេលកើតហេតុ គេឃើញមានរថយន្តម៉ាក Camry Hybrid ពណ៌ស្ករ ពាក់ផ្លាកលេខ នគ បាល 2.0798 ចតចោលនៅលើចិញ្ចើមផ្លូវជាតិលេខ១ ដោយគ្មានការដាក់ភ្លើងសញ្ញាចរាចរណ៍ព្រមានអ្វីឡើយ។
ភ្លាមៗនោះ ស្រាប់តែមានរថយន្តម៉ាក CHEVROLET TRACKER ពណ៌ស ពាក់ផ្លាកលេខ ភ្នំពេញ 2BY-9942 បើកបរដោយបុរសម្នាក់ ធ្វើដំណើរតាមបណ្ដោយផ្លូវជាតិលេខ១ ទិសដៅពីកើតទៅលិច ក្នុងល្បឿនលឿន និងស្ថិតក្នុងស្ថានភាពស្រវឹងស្រា។
នៅពេលបើកមកដល់ចំណុចកើតហេតុ បុរសរូបនេះបានរេចង្កូតជ្រុលទៅបុកពីក្រោយរថយន្ត Camry Hybrid ដែលចតនៅលើចំណីផ្លូវយ៉ាងពេញទំហឹង បណ្ដាលឱ្យរថយន្តទាំងពីរគ្រឿងរងការខូចខាតយ៉ាងដំណំ។
ក្រោយពេលកើតហេតុ ដោយសារតែអ្នកបើកបររថយន្ត CHEVROLET TRACKER ទទួលស្គាល់កំហុសរបស់ខ្លួន ភាគីទាំងពីរបានចរចាគ្នា ហើយម្ចាស់រថយន្ត CHEVROLET ក៏បានព្រមសងសំណងដល់ម្ចាស់រថយន្ត Camry Hybrid ពាក់ផ្លាកលេខនគរបាល ដើម្បីបញ្ចប់រឿងគ្នានៅកន្លែងកើតហេតុ ដោយមិនបានប្ដឹងផ្ដល់ទៅសមត្ថកិច្ចឡើយ។
គ្រោះថ្នាក់នេះបានបង្កការភ្ញាក់ផ្អើលដល់ប្រជាពលរដ្ឋនៅតំបន់នោះមួយរយៈពេល ប៉ុន្តែសំណាងល្អដែលគ្មាននរណាម្នាក់រងរបួសធ្ងន់ធ្ងរនោះទេ។ មន្ត្រីជំនាញបានអំពាវនាវដល់អ្នកបើកបរទាំងអស់ត្រូវប្រុងប្រយ័ត្នខ្ពស់ និងជៀសវាងការបើកបរក្រោមឥទ្ធិពលគ្រឿងស្រវឹង ព្រមទាំងត្រូវដាក់ភ្លើងសញ្ញាព្រមានពេលចតយប់ដើម្បីការពារគ្រោះថ្នាក់។
