By វ៉ាស៊ីនតោន៖ ប្រធានាធិបតីអាមេរិក លោក ដូណាល់ ត្រាំ ធ្លាប់បានអំពាវនាវឱ្យសម្ព័ន្ធមិត្តទាំងអឺរ៉ុប និងអាស៊ី ជួយបើកច្រកសមុទ្រ Hormuz ឡើងវិញ ប៉ុន្តែមិនមានប្រទេសណាមួយឆ្លើយតបឡើយ។ ឥឡូវនេះ រដ្ឋមន្ត្រីក្រសួងសង្គ្រាមអាមេរិក លោក Pete Hegseth បានរិះគន់យ៉ាងខ្លាំងចំពោះបណ្តាប្រទេសទាំងនេះ ដែលនៅតែបន្តពឹងផ្អែកលើយោធាអាមេរិក ដើម្បីដោះស្រាយវិបត្តិច្រកសមុទ្រដ៏សំខាន់នេះ។
យោងតាមសារព័ត៌មាន Bloomberg ចេញផ្សាយនៅថ្ងៃទី២៤ ខែមេសា ឆ្នាំ២០២៦ លោក Hegseth បានថ្លែងក្នុងសន្និសីទសារព័ត៌មានមួយកាលពីថ្ងៃសុក្រថា៖ «អស់រយៈពេលជាច្រើនទសវត្សរ៍មកហើយ ដែលអឺរ៉ុប និងអាស៊ីទទួលបានផលប្រយោជន៍ពីការការពាររបស់យើង ប៉ុន្តែពេលវេលានៃការប្រើប្រាស់ដោយសេរីនោះបានបញ្ចប់ទៅហើយ។ អាមេរិក និងពិភពលោកសេរី សមនឹងទទួលបានសម្ព័ន្ធមិត្តដែលមានសមត្ថភាព និងស្មោះត្រង់»។
ប្រមុខមន្ទីរបញ្ចកោណរូបនេះបានលើកឡើងទៀតថា ការបិទច្រក Hormuz ដែលជាផ្លូវទឹកដ៏សំខាន់សម្រាប់លំហូរប្រេង និងឧស្ម័នចេញពីឈូងសមុទ្រពែរ្ស កំពុងប្រឈមនឹងហានិភ័យកាន់តែខ្លាំងឡើងជារៀងរាល់ថ្ងៃ។ លោកបានសង្កត់ធ្ងន់ថា អឺរ៉ុប និងអាស៊ីពឹងផ្អែកលើប្រេង និងឧស្ម័នពីឈូងសមុទ្រពែរ្សច្រើនជាងសហរដ្ឋអាមេរិកទៅទៀត។
គួរបញ្ជាក់ថា ច្រក Hormuz ត្រូវបានបិទនៅថ្ងៃទី២៨ ខែកុម្ភៈ បន្ទាប់ពីសហរដ្ឋអាមេរិក និងអ៊ីស្រាអែល បានវាយប្រហារទ្រង់ទ្រាយធំទៅលើអ៊ីរ៉ង់ ហើយទីក្រុងតេហេរ៉ង់ក៏បានសងសឹកជាបន្តបន្ទាប់។ វិបត្តិនេះកំពុងបង្កភាពតានតឹងផ្នែកសេដ្ឋកិច្ច និងថាមពលសកលលោកទាំងមូល។
