By វ៉ាស៊ីនតោន៖ លោកដូណាល់ត្រាំបានបញ្ជូនកូនប្រសា និងបេសកជនពិសេស លោកស្ទីវវីតខូស ទៅកាន់ប្រទេសប៉ាគីស្ថានជាថ្មីម្តងទៀត ដើម្បីបើកការចរចាជាមួយអ៊ីរ៉ង់ជុំទីពីរ។
អ្នកនាំពាក្យសេតវិមានបានបញ្ជាក់ថា លោកទាំងពីរបានចេញដំណើរតាំងពីល្ងាចថ្ងៃសុក្រ ហើយនឹងជួបជាមួយរដ្ឋមន្ត្រីការបរទេសអ៊ីរ៉ង់ លោកអារ៉ាក់ឈី នៅទីក្រុងឥស្លាម៉ាបាត។
សេតវិមានសង្ឃឹមយ៉ាងខ្លាំងថា ការសន្ទនាលើកនេះនឹងទទួលបានលទ្ធផលជាកិច្ចព្រមព្រៀងមួយចំនួន។
គួរបញ្ជាក់ថា លោករដ្ឋមន្ត្រីការបរទេសអ៊ីរ៉ង់បានប្រកាសពីមុនថា លោកនឹងធ្វើដំណើរទៅកាន់ប៉ាគីស្ថាន រុស្ស៊ី និងអូម៉ង់ ដើម្បីពិនិត្យមើលលទ្ធភាពបើកការចរចាឡើងវិញ ដែលអាចបញ្ចប់ការវាយប្រហាររបស់អាមេរិក និងអ៊ីស្រាអែលមកលើអ៊ីរ៉ង់។ នេះជាចំណុចស្នូលដែលអ៊ីរ៉ង់កំពុងទាមទារ។
ចំណែកឯអនុប្រធានាធិបតីអាមេរិក លោកជេឌីវេន ដែលធ្លាប់ដឹកនាំគណៈប្រតិភូជុំទីមួយ លើកនេះលោកមិនបានចូលរួមទេ ប៉ុន្តែបានត្រៀមលក្ខណៈរួចជាស្រេចដើម្បីចេញដំណើរប្រសិនបើចាំបាច់។ អ្នកនាំពាក្យសេតវិមានបន្ថែមថា លោកត្រាំ លោកវេន និងរដ្ឋមន្ត្រីការបរទេសលោករូប៊ីអូ កំពុងតាមដានស្ថានការណ៍យ៉ាងជិតស្និទ្ធ។
ទន្ទឹមនេះ លោកមហាម៉ាត់ បាហ្គើ ហ្កាលីបាហ្វ ដែលធ្លាប់ដឹកនាំគណៈប្រតិភូអ៊ីរ៉ង់កាលពីជុំទីមួយ ក៏មិនបានចូលរួមក្នុងការចរចាលើកនេះដែរ។ លោកអារ៉ាក់ឈីទំនងជានឹងពិភាក្សាអំពីគម្រោងគ្រប់គ្រងច្រកសមុទ្រហ័រម៉ូសជាមួយអូម៉ង់ផងដែរ។
គួររំលឹកថា អ៊ីរ៉ង់ធ្លាប់ប្រកាសថា ខ្លួននឹងមិនចរចាជាមួយអាមេរិកទេ លុះត្រាតែអាមេរិកលុបចោលការបិទខ្ទប់ដែនសមុទ្រជាមុនសិន។ រីឯអាមេរិកវិញក៏ទាមទារឱ្យអ៊ីរ៉ង់កាត់រំសាយកម្មវិធីនុយក្លេអ៊ែរ និងបញ្ឈប់ការបិទខ្ទប់ច្រកហ័រម៉ូស ទើបខ្លួនយល់ព្រមតាមសំណើរបស់អ៊ីរ៉ង់។
ប្រភព៖ The Guardian និងប្រភពដទៃទៀត
អត្ថបទដោយ៖ សុខ មង្គល
