កម្ពុជានាំចេញទៅ EU សម្រេចបានជាង ១,១ ពាន់លានដុល្លារក្នុងត្រីមាសទី១ ឆ្នាំ២០២៦

ភ្នំពេញ៖ ក្រសួងពាណិជ្ជកម្មបានឱ្យដឹងថា កម្ពុជានាំចេញទៅកាន់សហភាពអឺរ៉ុប (EU) សម្រេចបានជាង ១,១ ពាន់លានដុល្លារ ក្នុងត្រីមាសទី១ ឆ្នាំ២០២៦ កើនឡើង ៨,៣២% បើធៀបនឹងរយៈពេលដូចគ្នាកាលពីឆ្នាំមុន។

គិតចាប់ពីខែមករា ដល់ខែមីនា ២០២៦ ការដោះដូរទំនិញរវាងកម្ពុជា និង EU មានទំហំ ១,៣៧ ពាន់លានដុល្លារ កើនឡើង ៧,៨០%។ ក្នុងនោះ កម្ពុជានាំចេញបានជាង ១,១៩ ពាន់លានដុល្លារ ខណៈ EU នាំចូលមកវិញ ១៧៥ លានដុល្លារ។

ទីផ្សារនាំចេញសំខាន់ៗរបស់កម្ពុជារួមមាន បែលហ្ស៊ិក បារាំង អាល្លឺម៉ង់ ហូឡង់ និងអេស្ប៉ាញ ដោយទំនិញសំខាន់ៗមានដូចជា សម្លៀកបំពាក់ ស្បែកជើង និងផលិតផលធ្វើដំណើរជាដើម។

លោក ប៉ែន សុវិជាតិ រដ្ឋលេខាធិការ និងជាអ្នកនាំពាក្យក្រសួងពាណិជ្ជកម្ម បានមានប្រសាសន៍ថា កំណើនពាណិជ្ជកម្មនេះបង្ហាញថា កម្ពុជានៅបន្តរក្សាទីផ្សារសំខាន់ៗបាន ព្រមទាំងពង្រឹងជំនឿចិត្តពីអ្នកបញ្ជាទិញ និងខ្សែច្រវាក់ផ្គត់ផ្គង់សកល។

ធនាគារអភិវឌ្ឍន៍អាស៊ី (ADB) បានព្យាករថា កំណើនសេដ្ឋកិច្ចកម្ពុជានឹងសម្រេចបាន ៤,៥% នៅឆ្នាំ២០២៦ ដោយវិស័យកម្មន្តសាលនៅតែជាក្បាលម៉ាស៊ីនសំខាន់ ដែលទិន្នផលឧស្សាហកម្មត្រូវបានរំពឹងថានឹងកើនឡើង ៧,៣% រួមមានគ្រឿងបង្គុំអគ្គិសនី សំបកកង់ និងគ្រឿងសង្ហារឹម។

គួរបញ្ជាក់ថា ក្នុងឆ្នាំ២០២៥ ការដោះដូរទំនិញរវាងកម្ពុជា និង EU មានទំហំ ៥,៨៧ ពាន់លានដុល្លារ កើន ១០,២០% បើធៀបនឹងឆ្នាំ២០២៤។