By ទីក្រុងមែលប៊ន ប្រទេសអូស្ត្រាលី៖ លោកស្រី ឡោក ខេង ប្រធានគណៈកម្មការទី៨ នៃរដ្ឋសភា និងជាអនុប្រធានវេទិកាសមាជិកសភាអាស៊ីស្តីពីប្រជាជន និងអភិវឌ្ឍន៍ (AFPPD) បានអញ្ជើញចូលរួម «វេទិកាកម្រិតខ្ពស់រវាងរដ្ឋមន្ត្រី និងសមាជិកសភា» ក្នុងក្របខ័ណ្ឌសន្និសីទអន្តរជាតិ Women Deliver 2026 នៅថ្ងៃទី២៧ ខែមេសា ឆ្នាំ២០២៦។
វេទិកានេះប្រមូលផ្តុំសមាជិកសភា និងរដ្ឋមន្ត្រីជិត ១០០រូប មកពីបណ្តាប្រទេសនានា ក្នុងគោលដៅតភ្ជាប់តួនាទីដឹកនាំរវាងស្ថាប័ននីតិប្បញ្ញត្តិ និងនីតិប្រតិបត្តិ ដើម្បីជំរុញសិទ្ធិ និងសុខភាពបន្តពូជ និងផ្លូវភេទ ដែលជាមូលដ្ឋានគ្រឹះនៃសមភាពយេនឌ័រ និងយុត្តិធម៌សង្គម។
កិច្ចពិភាក្សាផ្តោតលើការងារអាទិភាពចំនួន ៣ រួមមាន៖ (១) តួនាទីនីតិកម្ម និងថវិកា ក្នុងការរៀបចំច្បាប់ និងគោលនយោបាយ, (២) កិច្ចសហប្រតិបត្តិការតំបន់ ដើម្បីឆ្លើយតបនឹងបញ្ហាប្រឈមសកល និង (៣) យុទ្ធសាស្ត្រប្រតិបត្តិ បង្វែរការសន្យាអន្តរជាតិទៅជាសកម្មភាពជាក់ស្តែង។
ជាលទ្ធផលផ្លូវការ អង្គប្រជុំបានអនុម័ត «សេចក្តីថ្លែងការណ៍ទីក្រុងមែលប៊ន» ស្តីពីការសម្រេចឱ្យបាននូវភាពធន់នៃប្រជាសាស្ត្រ ដែលជាឯកសារសមិទ្ធផលដ៏សំខាន់ បញ្ជាក់ពីការប្តេជ្ញាចិត្តរួមគ្នារបស់បណ្តាប្រទេសក្នុងតំបន់អាស៊ីប៉ាស៊ីហ្វិក ក្នុងការធានាសិទ្ធិសុខភាពពេញលេញសម្រាប់គ្រប់បុគ្គល។
គួរជម្រាបថា ពិធីបើកវេទិកានេះមានការចូលរួមពីឥស្សរជនជាន់ខ្ពស់ដូចជា នាយករដ្ឋមន្ត្រីទូវ៉ាលូ, នាយកប្រតិបត្តិ UNFPA និងអគ្គនាយក IPPF។ បន្ទាប់ពីនេះ លោកស្រី ឡោក ខេង និងគណៈប្រតិភូ បានបន្តចូលរួមពិធីបើកជាផ្លូវការនៃសន្និសីទ Women Deliver 2026 ដែលជាវេទិកាស្ត្រីដ៏ធំបំផុតមួយនៅលើពិភពលោកផងដែរ៕
ដោយ៖ សិលា
