By ភ្នំពេញ៖ លោកស្រី អ៊ាត សោភា រដ្ឋមន្ត្រីស្តីទីក្រសួងការបរទេស និងសហប្រតិបត្តិការអន្តរជាតិកម្ពុជា និងលោក Mario José Armengol Campos ឯកអគ្គរដ្ឋទូតនីការ៉ាហ្កាប្រចាំកម្ពុជា បានចុះហត្ថលេខាលើឯកសារសំខាន់ៗចំនួន ២ នៅថ្ងៃទី២៨ ខែមេសា ឆ្នាំ២០២៦ នៅទីស្តីការក្រសួងការបរទេស។
ឯកសារទាំងពីររួមមាន៖
(១) អនុស្សរណៈនៃការយោគយល់គ្នា (MoU) ស្តីពីការបង្កើតកិច្ចពិគ្រោះយោបល់នយោបាយ ដែលជាផលប្រយោជន៍រួមរវាងក្រសួងការបរទេសទាំងពីរ។
(២) កិច្ចព្រមព្រៀងស្តីពីការលើកលែងទិដ្ឋាការសម្រាប់អ្នកកាន់លិខិតឆ្លងដែនការទូត និងផ្លូវការ រវាងកម្ពុជា និងនីការ៉ាហ្កា។
ភាគីទាំងពីរបានសម្តែងការពេញចិត្តចំពោះវឌ្ឍនភាពនៃទំនាក់ទំនងទ្វេភាគី និងបានបញ្ជាក់សាជាថ្មីនូវការប្តេជ្ញាចិត្តក្នុងការពង្រឹង និងពង្រីកកិច្ចសហប្រតិបត្តិការរវាងប្រទេសទាំងពីរបន្ថែមទៀត។
គួរបញ្ជាក់ថា ការចុះហត្ថលេខានាពេលនេះ គឺជាព្រឹត្តិការណ៍ប្រវត្តិសាស្ត្រមួយ ដែលឆ្លុះបញ្ចាំងពីទំនាក់ទំនងការទូតដ៏ល្អប្រសើររវាងព្រះរាជាណាចក្រកម្ពុជា និងសាធារណរដ្ឋនីការ៉ាហ្កា។
ដោយ៖ សិលា
