By ទីក្រុងព្យុងយ៉ាង៖ កូរ៉េខាងជើងកំពុងប្រឈមមុខនឹងគ្រោះរាំងស្ងួតមិនធម្មតា និងធ្ងន់ធ្ងរនៅឆ្នាំនេះ ដែលអាចជះផលប៉ះពាល់យ៉ាងខ្លាំងដល់ការប្រមូលផល និងសន្តិសុខស្បៀងរបស់ប្រទេសឯកោនិយមមួយនេះ។
តាមការផ្សាយរបស់ទូរទស្សន៍រដ្ឋកូរ៉េខាងជើង គ្រោះរាំងស្ងួតខុសពីធម្មតាបានចាប់ផ្ដើមកើតឡើងនៅស្ទើរតែគ្រប់តំបន់ទូទាំងប្រទេស ដែលជាករណីកម្រក្នុងរយៈពេលប៉ុន្មានឆ្នាំចុងក្រោយនេះ។ កម្មករនៅតាមតំបន់នានាកំពុងផ្ដោតសំខាន់លើការការពារផលដំណាំដើមរដូវកុំឱ្យខូចខាត។
លោក ប៉ាក់ថេសុង (Pak Thae Song) នាយករដ្ឋមន្ត្រីកូរ៉េខាងជើង បានចុះពិនិត្យមើលកសិដ្ឋាននៅខេត្តព្យុងហ្កានខាងត្បូង (South Pyongan) និងខេត្តវ៉ាងហេខាងជើង (North Hwanghae) និងបានអំពាវនាវឱ្យពិនិត្យមើលធនធានទឹក និងប្រើប្រាស់ឱ្យមានប្រសិទ្ធភាពខ្ពស់។ លោកបានថ្លែងថា បើចង់ឱ្យការប្រមូលផលបានជោគជ័យ លុះត្រាតែយកឈ្នះលើគ្រោះរាំងស្ងួតកម្រិតធ្ងន់ធ្ងរនេះឱ្យបាន។
នៅតាមទីក្រុង និងខណ្ឌមួយចំនួន កំពុងតែជួសជុលទ្វារទឹក និងផ្លូវទឹកនានា។ កម្មករក៏កំពុងអនុវត្តវិធានការបច្ចេកទេស ពង្រឹងភាពធន់សម្រាប់ស្រូវសាលី និងស្រូវបាលី (barley) និងពង្រឹងការរីកលូតលាស់នូវដំណាំដើមរដូវ។
កូរ៉េខាងជើងកាលពីឆ្នាំមុនមានអាកាសធាតុក្ដៅបំផុតជាប្រវត្តិសាស្ត្រ ដោយការប្រែប្រួលអាកាសធាតុធ្វើឱ្យរលកកម្ដៅកើតឡើងកាន់តែញឹកញាប់ និងកាន់តែធ្ងន់ធ្ងរ។ ក្រុមអ្នកជំនាញព្រមានថា បាតុភូតអែលនីញ៉ូ (El Niño) អាចនឹងវិលមកវិញនៅឆ្នាំនេះ ដែលអាចបង្កជាកម្ដៅខ្លាំង គ្រោះរាំងស្ងួត និងភ្លៀងធ្លាក់ខ្លាំងនៅទ្វីបអាស៊ី។
លោកស្រី អេលីហ្សាបែត សាល់ម៉ុន (Elizabeth Salmon) អ្នករាយការណ៍ពិសេសអង្គការសហប្រជាជាតិទទួលបន្ទុកសិទ្ធិមនុស្សនៅកូរ៉េខាងជើង ធ្លាប់បានថ្លែងតាំងពីខែកុម្ភៈថា បញ្ហាខ្វះខាតស្បៀងអាហារជាកង្វល់ដ៏ធំរួចទៅហើយ។ តាមពិត កូរ៉េខាងជើងបានរស់នៅក្នុងភាពអត់ឃ្លានរាប់ទសវត្សរ៍មកហើយ និងធ្លាប់មានមនុស្សស្លាប់ដោយអត់អាហារជាច្រើននាក់ក្នុងឆ្នាំខ្លះ៕
ប្រភព៖ Channel News Asia និងប្រភពដទៃទៀត
