By រាជធានីភ្នំពេញ ៖ រដ្ឋាភិបាលសហរដ្ឋអាមេរិកបានបញ្ជាក់ជាថ្មីនូវការប្តេជ្ញាចិត្តក្នុងការចូលរួមថែរក្សាសន្តិភាព និងជំរុញឱ្យមានបទឈប់បាញ់យូរអង្វែងតាមព្រំដែនកម្ពុជា-ថៃ ខណៈបង្កើនជំនួយមនុស្សធម៌ដល់ប្រជាពលរដ្ឋរងគ្រោះ។
ការថ្លែងនេះធ្វើឡើងក្នុងឱកាសដែលលោកស្រី រ៉ូណា រ៉ាធោទ (Rona Rathod) ប្រធានផ្នែកនយោបាយស្ថានទូតសហរដ្ឋអាមេរិកប្រចាំកម្ពុជា បានដឹកនាំប្រតិភូចុះទស្សនកិច្ចពិភាក្សាការងារជាមួយឯកឧត្តម អ៊ុំ រាត្រី អភិបាលខេត្តបន្ទាយមានជ័យ កាលពីថ្ងៃទី២៩ ខែមេសា ឆ្នាំ២០២៦។
លោកស្រីបានគូសបញ្ជាក់ថា សហរដ្ឋអាមេរិកផ្ដោតលើការរក្សាសន្តិភាព និងចង់ឃើញបទឈប់បាញ់យូរអង្វែងនៅព្រំដែន ដើម្បីស្ថិរភាពអាស៊ានទាំងមូល។ សហរដ្ឋអាមេរិកនឹងបន្តបេសកកម្មជួយបោសសម្អាតគ្រាប់យុទ្ធភណ្ឌមិនទាន់ផ្ទុះ និងបានត្រៀមថវិកាជំនួយមនុស្សធម៌តាមរយៈ IOM និង AOT។
ឯកឧត្តម អ៊ុំ រាត្រី បានជម្រាបថា ខេត្តបន្ទាយមានជ័យមានព្រំប្រទល់ជាប់ថៃប្រវែង ១៥៣គីឡូម៉ែត្រ ហើយជម្លោះប្រដាប់អាវុធបានបង្កឱ្យមានវិនាសកម្មធ្ងន់ធ្ងរ ដោយជនស៊ីវិលស្លាប់ ៩នាក់ របួស ៧៧នាក់ និងផ្ទះខូចខាតជាង ២,០០០ខ្នង។ គ្រាប់បែកចង្កោមនៅរាយប៉ាយស្ទើរគ្រប់ទីកន្លែង និងភូមិចំនួន ៦ទៀតមិនទាន់អាចត្រឡប់វិញបានឡើយ។
ទោះជាយ៉ាងណា រាជរដ្ឋាភិបាលក្រោមការដឹកនាំរបស់សម្ដេចមហាបវរធិបតី ហ៊ុន ម៉ាណែត បានដាក់ចេញគោលការណ៍រៀបចំជម្រកបណ្ដោះអាសន្នថ្មី ដោយគ្រួសាររងគ្រោះទទួលបានដីទំហំ ២០mx៣០m លើផ្ទៃដីសរុប ៤០០ហិកតា សម្រាប់សាងសង់លំនៅឋាន និងបង្កបង្កើនផលឡើងវិញ៕
