By ខេត្តបន្ទាយមានជ័យ៖ នៅថ្ងៃទី០១ ខែឧសភា ឆ្នាំ២០២៦ នេះ សមត្ថកិច្ចច្រកទ្វារព្រំដែនអន្តរជាតិប៉ោយប៉ែត បានទទួលពលរដ្ឋខ្មែរចំនួន ៥៨ នាក់ ដែលត្រូវបានអាជ្ញាធរថៃបញ្ជូនត្រឡប់មកកម្ពុជាវិញ ក្រោយពីបានឆ្លងដែនខុសច្បាប់។
ក្នុងនោះ មានស្ត្រីចំនួន ២១ នាក់ និងកុមារ ០១ នាក់ ដែលភាគច្រើនបានជឿជាក់លើអ្នករកស៊ីខុសច្បាប់ (មេខ្យល់) លួងលោមឲ្យឆ្លងដែនទៅធ្វើការនៅប្រទេសថៃ ដោយប្រថុយនឹងគ្រោះថ្នាក់ដល់ជីវិត។
ដោយអនុវត្តតាមការណែនាំរបស់ លោកឧត្តមសេនីយ៍ត្រី អុី ចំរើន នាយប៉ុស្តិ៍នគរបាលច្រកទ្វារព្រំដែនអន្តរជាតិប៉ោយប៉ែត នៅវេលាម៉ោង ១៣:៤០ រសៀល មន្ត្រីជំនាញបានទទួលពលរដ្ឋទាំងអស់ដោយយកចិត្តទុកដាក់ និងបានរៀបចំឯកសារឲ្យបានត្រឹមត្រូវ។
ក្រៅពីនេះ សមត្ថកិច្ចក៏បានផ្តល់នូវទឹកសុទ្ធ និងនំប៉័ងជូនដល់ពលរដ្ឋទាំងអស់ គឺម្នាក់ៗទទួលបាននំប៉័ង ០១ ដើម និងទឹកសុទ្ធ ០១ ដប ព្រមទាំងបានជួយដឹកជញ្ជូនពួកគាត់ទៀតផង។
ដោយមានការណែនាំពី លោកឧត្តមសេនីយ៍ទោ ប្រធាននាយកដ្ឋានច្រកទ្វារទី ១ ប៉ុស្តិ៍បានធ្វើការសម្រង់សាវតារ និងថតរូបតម្កល់ទុកជាឯកសាររបស់ពលរដ្ឋទាំងអស់ បន្ទាប់មកបានប្រគល់ជូនទៅមជ្ឈមណ្ឌលសំចតប៉ោយប៉ែត ដើម្បីអនុវត្តនីតិវិធីបន្ត ដែលបានបញ្ចប់នារសៀលថ្ងៃដដែល។
សមត្ថកិច្ចបានអំពាវនាវដល់ប្រជាពលរដ្ឋកុំឲ្យជឿជាក់លើការលួងលោមរបស់មេខ្យល់ ដែលនាំឲ្យឆ្លងដែនខុសច្បាប់ ព្រោះអាចប្រឈមនឹងគ្រោះថ្នាក់ធ្ងន់ធ្ងរដល់អាយុជីវិត។
ដោយ៖ វណ្ណា
