By រាជធានីភ្នំពេញ៖ ក្រសួងព័ត៌មានបានបើកយុទ្ធនាការ «និយាយថាទេ ចំពោះព័ត៌មានក្លែងក្លាយជំហានទី២» នៅវិទ្យាល័យហ៊ុន សែន ប៊ុន រ៉ានី វត្តភ្នំ ដោយមានសិស្សានុសិស្សជាង ២,៥០០នាក់ចូលរួម។ ការនេះធ្វើឡើងដោយសារប្រជាជនកម្ពុជាកំពុងប្រើប្រាស់ទូរសព្ទច្រើន និងងាយរងគ្រោះពីព័ត៌មានមិនពិត។
ថ្លែងក្នុងពិធីបើកនាព្រឹកថ្ងៃទី១៨ ខែឧសភា ឆ្នាំ២០២៦ ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន បានថ្លែងថា ព័ត៌មានក្លែងក្លាយបានផ្តល់ផលអវិជ្ជមានដល់សង្គមជាតិ ដែលចាំបាច់យើងត្រូវចូលរួមទប់ស្កាត់។
ឯកឧត្តមរដ្ឋមន្ត្រីបានណែនាំគន្លឹះ៣យ៉ាងដើម្បីសម្គាល់ព័ត៌មានក្លែងក្លាយ៖ ទី១-ពិនិត្យប្រភពច្បាស់លាស់ ទី២-ពិនិត្យមើលការផ្សព្វផ្សាយច្រើនគ្នា និង ទី៣-ត្រូវគិតពិចារណាមុនជឿ។ ឯកឧត្តមបានផ្តល់អនុសាសន៍ឱ្យជឿលើប្រភពផ្លូវការរបស់រដ្ឋ និងបណ្តាញផ្សព្វផ្សាយឯកជនដែលមានប្រភពច្បាស់លាស់។
ឯកឧត្តមរដ្ឋមន្ត្រីបានគូសបញ្ជាក់ថា ការចែករំលែកព័ត៌មានក្លែងក្លាយអាចនាំឱ្យប្រឈមនឹងផ្លូវច្បាប់ ដូច្នេះសូមសិស្សានុសិស្សចៀសវាង និងផ្តោតលើការសិក្សា ព្រមទាំងចូលរួមទប់ស្កាត់ព័ត៌មានមិនពិតទាំងអស់គ្នា។
យុទ្ធនាការនេះនឹងត្រូវពង្រីកទៅតាមសាលារៀននៅទូទាំងប្រទេស ដោយមានការចូលរួមពីមន្ទីរព័ត៌មានរាជធានីខេត្ត ដើម្បីលើកកម្ពស់អក្ខរកម្មព័ត៌មាន និងទប់ស្កាត់ការរីកសាយភាយព័ត៌មានក្លែងក្លាយនៅកម្ពុជា ជាពិសេសចំពោះសិស្សានុសិស្សថ្នាក់មធ្យមសិក្សា៕
