By ខេត្តកែប៖ ក្រោយពីការស្វែងរកអស់រយៈពេលជាច្រើនម៉ោង ក្រុមការងារសង្គ្រោះបានរកឃើញសាកសពជនរងគ្រោះទាំងបីនាក់ ដែលបាត់ខ្លួនក្នុងហេតុការណ៍លិចទូកនៅសមុទ្រកែប កាលពីថ្ងៃទី១៧ ឧសភា ឆ្នាំ២០២៦។ សាកសពទាំងបីរួមមានម្តាយ និងកូនប្រុសពីរនាក់ ត្រូវបានគេរកឃើញនៅព្រឹកថ្ងៃទី១៨ ឧសភា វេលាម៉ោង ៦ ព្រឹក ដោយអណ្តែតមកក្បែរឆ្នេរជិតកន្លែងកើតហេតុ។
តាមរបាយការណ៍សមត្ថកិច្ច ទូករបស់គ្រួសារមួយ ដែលបានចេញទៅរាវងាវនៅសមុទ្រកែប ត្រូវបានខ្យល់សមុទ្របក់បោកយ៉ាងខ្លាំង រហូតបណ្តាលឱ្យលិចបាត់ទៅវិញ។ នៅលើទូកមានមនុស្សបួននាក់ ក្នុងនោះឪពុកឈ្មោះ រស់ សាម អាយុ ៤០ ឆ្នាំ បានហែលទឹករួចជីវិត ចំណែកម្តាយឈ្មោះ ណាំ ធារី អាយុ ៣៨ ឆ្នាំ និងកូនប្រុសពីរនាក់អាយុ ១០ ឆ្នាំ និង ៨ ឆ្នាំ បានបាត់ខ្លួន។
ទីតាំងកន្លែងកើតហេតុ ស្ថិតនៅចំណុចមុខឃ្លងព្រែកសរសៀរ ភូមិអូរក្រសារ សង្កាត់អូរក្រសារ ក្រុងកែប។ លោក ហ៊ួរ មិថុនា អភិបាលរងខេត្ត និងជាប្រធានលេខាធិការដ្ឋានគណៈកម្មាធិការគ្រប់គ្រងគ្រោះមហន្តរាយខេត្តកែប បានដឹកនាំកម្លាំងចម្រុះចុះស្វែងរកតាំងពីវេលាម៉ោង ១ រសៀល រហូតដល់ម៉ោង ១១ យប់ថ្ងៃទី១៧ ឧសភា តែនៅតែរកមិនឃើញ។
ទីបំផុតនៅព្រឹកថ្ងៃទី១៨ ឧសភា ឆ្នាំ២០២៦ ក្រុមការងារបានរកឃើញសាកសពទាំងបីនាក់អណ្តែតមកក្បែរឆ្នេរជិតកន្លែងលិចទូក។ សមត្ថកិច្ចបានប្រគល់សពជូនក្រុមគ្រួសារដើម្បីធ្វើបុណ្យតាមប្រពៃណី ក្រោមទិដ្ឋភាពសោកសៅពីសំណាក់សាច់ញាតិទាំងអស់។
