វេទិកាសារព័ត៌មាន៖ អ្នកជំនាញ និងអ្នកសារព័ត៌មានជាង ១០០នាក់ ពិភាក្សាពីបញ្ហាប្រឈម AI ក្រមសីលធម៌ និងវិជ្ជាជីវៈ

ភ្នំពេញ៖ អ្នកជំនាញ និងអ្នកសារព័ត៌មានប្រមាណ ១០០នាក់ បានចូលរួមក្នុងវេទិកាសារព័ត៌មានដ៏មានសារៈសំខាន់មួយ ក្រោមប្រធានបទ «AI ក្រមសីលធម៌ និងវិជ្ជាជីវៈ៖ តើយើងគួរដើរទៅមុខដោយរបៀបណា?» ដែលបានប្រព្រឹត្តទៅនៅថ្ងៃទី១ ខែឧសភា ឆ្នាំ២០២៦។ វេទិកានេះរៀបចំឡើងដោយក្លឹបអ្នកកាសែតកម្ពុជា នៅមជ្ឈមណ្ឌលអភិវឌ្ឍធុរកិច្ច (ជាន់ទី១៥) ស្ថិតនៅលើផ្លូវ OCIC ខណ្ឌជ្រោយចង្វា រាជធានីភ្នំពេញ។

ស្របពេលដែលវិស័យសារព័ត៌មានទាំងនៅកម្ពុជា និងពិភពលោកកំពុងជួបប្រទះនូវការប្រែប្រួលយ៉ាងគួរឱ្យកត់សម្គាល់ ដោយសារតែបញ្ហាប្រឈម និងទំនើបកម្មនៃប្រព័ន្ធបច្ចេកវិទ្យា ពិសេសបញ្ញាសិប្បនិម្មិត (AI) វេទិកានេះបានក្លាយជាវេទិការួមគ្នាក្នុងការផ្លាស់ប្តូរយោបល់ និងបទពិសោធន៍។

វេទិកានេះទទួលបានការអញ្ជើញចូលរួមពីសំណាក់ថ្នាក់ដឹកនាំ និងអ្នកជំនាញជាច្រើនរូប រួមមាន៖ លោកបណ្ឌិត សេង សុភាព ប្រធានបណ្ឌិត្យសភាបច្ចេកវិទ្យាឌីជីថលកម្ពុជា, លោកបណ្ឌិត យង់ ពៅ អគ្គលេខាធិការនៃរាជបណ្ឌិត្យសភាកម្ពុជា, លោក ផុស សុវណ្ណ អគ្គនាយកនៃអគ្គនាយកដ្ឋានព័ត៌មាន និងសោតទស្សន៍នៃក្រសួងព័ត៌មាន, អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា, និងលោក ពុយ គា ប្រធានក្លឹបអ្នកកាសែតកម្ពុជា ព្រមទាំងអ្នកជំនាញលើវិស័យព័ត៌មាន និងសោតទស្សន៍ជាច្រើនរូបទៀត។

ក្លឹបអ្នកកាសែតកម្ពុជាបានកត់សម្គាល់ឃើញថា ស្ថានភាពបច្ចុប្បន្នមិនគ្រាន់តែប៉ះពាល់ដល់វិស័យសារព័ត៌មានប៉ុណ្ណោះទេ ប៉ុន្តែថែមទាំងប៉ះពាល់ដល់ការអភិវឌ្ឍវិស័យធុរកិច្ចផងដែរ។ ការរៀបចំវេទិកានេះឡើង គឺដើម្បីផ្តល់ឱកាសដល់វាគ្មិនមកពីគ្រប់វិស័យ រួមមានផ្នែក AI ធុរកិច្ច និងព័ត៌មាន បានជជែកពិភាក្សាគ្នាយ៉ាងក្បោះក្បាយអំពីស្ថានភាពទូទៅនៃវិស័យសារព័ត៌មាន តួនាទីរបស់អ្នកសារព័ត៌មាន និងធុរកិច្ចជន ព្រមទាំងការប្រើប្រាស់ AI ប្រកបដោយប្រយោជន៍ដល់សង្គម។

គួរបញ្ជាក់ផងដែរថា ក្លឹបអ្នកកាសែតកម្ពុជាបានចាត់ទុកវេទិកានេះមានសារៈសំខាន់ណាស់សម្រាប់វិស័យសារព័ត៌មាន និងវិស័យធុរកិច្ចនៅកម្ពុជា។

ប្រភព៖ (CCFR)