ត្រាំសម្រេចដកទ័ពចេញពីអាល្លឺម៉ង់ ណាតូនិងសម្ព័ន្ធមិត្តព្រួយបារម្មណ៍ធ្ងន់ធ្ងរ

ការសម្រេចចិត្តរបស់ប្រធានាធិបតីអាមេរិក លោក ដូណាល់ ត្រាំ ក្នុងការដកទ័ពអាមេរិកចំនួន ៥,០០០ នាក់ចេញពីប្រទេសអាល្លឺម៉ង់ កំពុងបង្កភាពចម្រូងចម្រាសយ៉ាងខ្លាំងទាំងនៅក្នុងគណបក្សសាធារណរដ្ឋខ្លួនឯង និងជាមួយអង្គការណាតូ។

បើតាមសារព័ត៌មាន BBC ចុះផ្សាយថ្ងៃទី២ ខែឧសភា ឆ្នាំ២០២៦ ក្រសួងសង្គ្រាមអាមេរិកបានសម្រេចដកទ័ពនេះ បន្ទាប់ពីមានជម្លោះពាក្យសម្តីយ៉ាងតឹងសរសៃករវាងលោក ត្រាំ និងអធិការបតីអាល្លឺម៉ង់ Friedrich Merz ពាក់ព័ន្ធបញ្ហាសង្គ្រាមអ៊ីរ៉ង់។

ជុំវិញរឿងនេះ អង្គការណាតូបានឲ្យដឹងថា ខ្លួនកំពុងធ្វើការជាមួយអាមេរិកដើម្បីឲ្យមានការបំភ្លឺ និងពន្យល់លម្អិតអំពីការសម្រេចចិត្តនេះ។

អ្នកនាំពាក្យអង្គការណាតូ លោកស្រី Allison Hart បានបង្ហោះសារលើបណ្តាញសង្គម X ថា ការកែសម្រួលនេះសបញ្ជាក់យ៉ាងច្បាស់អំពីតម្រូវការរបស់អឺរ៉ុប ដែលត្រូវបន្តវិនិយោគបន្ថែមទៀតលើវិស័យការពារជាតិ។

ទន្ទឹមនោះ គណបក្សសាធារណរដ្ឋបានបង្ហាញក្តីបារម្ភថា ការដកទ័ពនេះពិតជាប៉ះពាល់ខ្លាំងដល់សន្តិសុខអឺរ៉ុប ហើយហាក់ដូចជាផ្តល់បច្ច័យល្អដល់រុស្ស៊ី។ សមាជិកព្រឹទ្ធសភា Roger Wicker និងតំណាងរាស្ត្រ Mike Rogers បានព្រមានថា ការដកទ័ពនេះប្រៀបបានជាការបញ្ជូនសញ្ញាទៅកាន់លោក ពូទីន។

សូមជម្រាបថា គិតត្រឹមថ្ងៃទី៣១ ខែធ្នូ ឆ្នាំ២០២៥ សហរដ្ឋអាមេរិកមានកងទ័ពបំពេញកាតព្វកិច្ចសកម្មចំនួន ៣៦,៤៣៦ នាក់ នៅអាល្លឺម៉ង់ បើប្រៀបធៀបទៅនឹង ១២,៦៦២ នាក់នៅអ៊ីតាលី និង ៣,៨១៤ នាក់នៅអេស្ប៉ាញ៕