By អន្តរជាតិ៖ ច្រកសមុទ្រ Hormuz នៅតែស្ថិតក្នុងស្ថានភាពបិទជិតទាំងស្រុង បន្ទាប់ពីសហរដ្ឋអាមេរិក និងអ៊ីស្រាអែល បានបើកការវាយប្រហារតាមផ្លូវអាកាសលើអ៊ីរ៉ង់ ដែលជំរុញឱ្យតេអេរ៉ង់សម្រេចបិទផ្លូវទឹកដ៏សំខាន់មួយនេះ ដែលបម្រុងសម្រាប់ដឹកជញ្ជូនប្រេង និងឧស្ម័នធម្មជាតិរាវរហូតដល់ ២០% នៃពិភពលោក។
ក្រោយការប្រកាសនេះត្រឹមតែមួយថ្ងៃ ការប្រយុទ្ធគ្នាកម្រិតស្រាលហាក់ផ្ទុះឡើងវិញ ដោយកងទ័ពអាមេរិកបានវាយប្រហារទូកតូចៗរបស់អ៊ីរ៉ង់ជាច្រើនគ្រឿង ខណៈអ៊ីរ៉ង់ត្រូវបានគេរាយការណ៍ថាបានបើកការវាយប្រហារតបតជាបន្តបន្ទាប់។
តើ “គម្រោងសេរីភាព” របស់លោក Trump មានន័យយ៉ាងណា?
ប្រធានាធិបតី Trump បានថ្លែងថា សហរដ្ឋអាមេរិកត្រូវបានស្នើសុំដោយប្រទេសនានា “មកពីជុំវិញពិភពលោក” ឱ្យជួយដោះលែងកប៉ាល់របស់ពួកគេដែលកំពុងជាប់ “ចាក់សោរនៅក្នុងច្រកសមុទ្រ Hormuz” ហើយលោកចាត់ទុកថាពួកគេគ្រាន់តែជា “អ្នកឈរមើលអព្យាក្រឹត និងគ្មានកំហុស”។
លោក Trump បានសរសេរនៅលើវេទិកា Truth Social ថា៖ «ចលនាកប៉ាល់នេះគ្រាន់តែមានបំណងដោះលែងមនុស្ស ក្រុមហ៊ុន និងប្រទេសដែលមិនបានធ្វើអ្វីខុសទាល់តែសោះ! ពួកគេជាជនរងគ្រោះនៃកាលៈទេសៈ»។ លោកបានបន្ថែមថា នេះជា «កាយវិការមនុស្សធម៌ក្នុងនាមសហរដ្ឋអាមេរិក ប្រទេសមជ្ឈិមបូព៌ា និងជាពិសេសប្រទេសអ៊ីរ៉ង់» ដោយសារកប៉ាល់ជាច្រើនកំពុងខ្វះខាតស្បៀងអាហារ និងសម្ភារៈចាំបាច់សម្រាប់ក្រុមនាវិក។
តើអ៊ីរ៉ង់មានប្រតិកម្មយ៉ាងណា?
ការប្រកាសរបស់លោក Trump ហាក់មានសម្លេងទន់ភ្លន់ជាងមុន ដោយថែមទាំងធ្វើឱ្យគេយល់ថាអ៊ីរ៉ង់អាចជាភាគីពាក់ព័ន្ធក្នុងប្រតិបត្តិការនេះផងដែរ។ ប៉ុន្តែទីក្រុងតេអេរ៉ង់មិនបានយល់ឃើញដូច្នោះទេ។
សេចក្តីថ្លែងការណ៍ពីប្រធានបញ្ជាការកណ្តាលអ៊ីរ៉ង់បានព្រមានថា ខ្លួននឹងវាយប្រហារ “កងកម្លាំងប្រដាប់អាវុធបរទេសណាមួយ” ដែលព្យាយាមចូលទៅជិត ឬចូលទៅក្នុងច្រកសមុទ្រ “ជាពិសេសកងទ័ពអាមេរិកដែលឈ្លានពាន”។ ឧត្តមសេនីយ៍ឯក Ali Abdollahi បានអះអាងថា ការឆ្លងកាត់ដោយសុវត្ថិភាពតាមរយៈច្រកសមុទ្រត្រូវតែសម្របសម្រួលជាមួយអ៊ីរ៉ង់ “ក្នុងកាលៈទេសៈទាំងអស់”។
តើយោធាអាមេរិកកំពុងអនុវត្តផែនការនេះយ៉ាងដូចម្តេច?
យោងតាមអង្គការសមុទ្រអន្តរជាតិ នាវិកប្រមាណ ២០.០០០ នាក់ និងនាវាជាង ២.០០០ គ្រឿង កំពុងជាប់គាំងនៅក្នុងឈូងសមុទ្រ ចាប់តាំងពីការចាប់ផ្តើមសង្គ្រាមជាមួយអ៊ីរ៉ង់ ដែលបង្កឱ្យមានការព្រួយបារម្ភពីការថយចុះនៃការផ្គត់ផ្គង់ និងផលប៉ះពាល់ដល់សុខភាពនាវិក។
លោកស្រី Olivia Wales អ្នកនាំពាក្យសេតវិមានបានថ្លែងថា៖ «ខណៈពេលដែលអ៊ីរ៉ង់បានជ្រើសរើសវាយប្រហារនាវាពាណិជ្ជកម្មដែលគ្មានកំហុស សហរដ្ឋអាមេរិកកំពុងទទួលយកហានិភ័យក្នុងនាមសហគមន៍អន្តរជាតិ ដើម្បីការពារពាណិជ្ជកម្ម និងណែនាំនាវាដែលជាប់គាំងដោយសុវត្ថិភាពឆ្លងកាត់ច្រកសមុទ្រ»។
ប៉ុន្មានម៉ោងក្រោយមក បញ្ជាការកណ្តាលសហរដ្ឋអាមេរិក (Centcom) បានប្រកាសដាក់ពង្រាយ «នាវាពិឃាតមីស៊ីលណែនាំ យន្តហោះជាង ១០០ គ្រឿង វេទិកាគ្មានមនុស្សបើកពហុដែន និងសមាជិកសេវាកម្មចំនួន ១៥.០០០ នាក់» សម្រាប់គាំទ្រប្រតិបត្តិការនេះ។ មេបញ្ជាការ Centcom ឧត្តមនាវីឯក Brad Cooper បានថ្លែងថា ឧទ្ធម្ភាគចក្រវាយប្រហារមួយចំនួនត្រូវបានប្រើដើម្បីលិចទូកអ៊ីរ៉ង់តូចៗចំនួន ៦ គ្រឿង ហើយលោកបានព្រមានថា «យើងនឹងបាញ់» ទៅលើនាវាអ៊ីរ៉ង់ណាមួយដែលជ្រៀតជ្រែកជាមួយកិច្ចខិតខំប្រឹងប្រែងនេះ។
ទោះបីជាព័ត៌មានលម្អិតបន្ថែមមិនទាន់ត្រូវបានបញ្ចេញច្រើននៅឡើយ ប៉ុន្តែលោក Cooper បានបញ្ជាក់ថា ប្រតិបត្តិការនេះនឹងបង្កើតផ្លូវទ្វេភាគីនៅក្នុងផ្លូវទឹកនេះនៅទីបំផុត៕
ប្រភព៖ (BBC)
