By វ៉ាស៊ីនតោន៖ នៅយប់ថ្ងៃទី៥ ខែឧសភា តាមម៉ោងភាគខាងកើតសហរដ្ឋអាមេរិក លោក ដូណាល់ ត្រាំ ប្រធានាធិបតីអាមេរិក បានធ្វើការប្រកាសភ្ញាក់ផ្អើលមួយតាមរយៈបណ្តាញសង្គម ដោយបញ្ជាក់ថារដ្ឋបាលរបស់លោកនឹងផ្អាកប្រតិបត្តិការ “ផែនការសេរីភាព” ជាបណ្តោះអាសន្ន។ ផែនការនេះពីមុនត្រូវបានដាក់ឱ្យដំណើរការក្នុងគោលបំណងធានាឱ្យការធ្វើនាវាចរណ៍ឆ្លងកាត់ច្រកសមុទ្រ Hormuz មានភាពរលូន និងសុវត្ថិភាព។
នៅក្នុងសេចក្តីថ្លែងការណ៍របស់លោក លោក Trump បានលើកឡើងថា ការសម្រេចចិត្តនេះគឺ “យោងតាមការស្នើសុំពីប៉ាគីស្ថាន និងប្រទេសមួយចំនួនទៀត” ព្រមទាំងទទួលស្គាល់ពី “ភាពជោគជ័យផ្នែកយោធាដ៏ធំធេង” របស់សហរដ្ឋអាមេរិកក្នុងប្រតិបត្តិការប្រឆាំងនឹងអ៊ីរ៉ង់។ លើសពីនេះ លោកបានបន្តថាមាន “ការវិវត្តដ៏សំខាន់” ក្នុងការចរចាជាមួយតំណាងអ៊ីរ៉ង់ ដែលកំពុងឈានទៅរក “កិច្ចព្រមព្រៀងគ្រប់ជ្រុងជ្រោយ និងចុងក្រោយ”។
យោងតាមការប្រកាសរបស់លោក Trump ភាគីទាំងពីរបានឈានដល់កិច្ចព្រមព្រៀងគោលការណ៍មួយ ដោយការបិទខ្ទប់ផ្លូវសមុទ្រនៃកំពង់ផែអ៊ីរ៉ង់នឹង “បន្តអនុវត្តយ៉ាងគ្រប់ជ្រុងជ្រោយ និងមានប្រសិទ្ធភាព” រីឯ “ផែនការសេរីភាព” វិញនឹងត្រូវផ្អាកជាបណ្តោះអាសន្ន “ដើម្បីសង្កេតមើលថាតើកិច្ចព្រមព្រៀងខាងលើអាចត្រូវបានចុះហត្ថលេខាឬទេ”។
ការប្រកាសនេះបានទាក់ទាញការចាប់អារម្មណ៍យ៉ាងខ្លាំងពីសហគមន៍អន្តរជាតិ ដោយសារតែច្រកសមុទ្រ Hormuz គឺជាចំណុចយុទ្ធសាស្ត្រដ៏សំខាន់សម្រាប់ការដឹកជញ្ជូនប្រេង និងថាមពលរបស់ពិភពលោក។
ប្រភព៖ (CCFR)
