UN ត្រៀមដំណោះស្រាយថ្មី គំរាមដាក់ទណ្ឌកម្មអ៊ីរ៉ង់ពីបទយកច្រកសមុទ្រ Hormuz ធ្វើចំណាប់ខ្មាំង

អង្គការសហប្រជាជាតិ (UN) កំពុងត្រៀមដំណោះស្រាយថ្មីមួយ ដោយព្រមានដាក់ទណ្ឌកម្ម និងវិធានការតឹងរឹងប្រឆាំងនឹងអ៊ីរ៉ង់ ប្រសិនបើទីក្រុងតេហេរ៉ង់មិនបញ្ឈប់ការវាយប្រហារលើនាវានៅច្រកសមុទ្រ Hormuz និងការទារថ្លៃផ្លូវខុសច្បាប់ ព្រមទាំងតម្រូវឱ្យបង្ហាញទីតាំងគ្រាប់មីនទាំងអស់ ដើម្បីស្តារសេរីភាពនាវាចរណ៍ឡើងវិញ។

សេចក្តីព្រាងដំណោះស្រាយដែលគាំទ្រដោយសហរដ្ឋអាមេរិក និងបណ្តាប្រទេសឈូងសមុទ្រ ទាមទារឱ្យអ៊ីរ៉ង់ចូលរួមសហការជាបន្ទាន់ជាមួយ UN ក្នុងការបង្កើតច្រករបៀងមនុស្សធម៌ ដើម្បីដឹកជញ្ជូនជំនួយសំខាន់ៗ និងទំនិញផ្សេងៗ។ នេះជាកិច្ចខិតខំប្រឹងប្រែងការទូតចុងក្រោយរបស់អាមេរិក បន្ទាប់ពីសំណើមុនត្រូវបានវ៉េតូដោយចិន និងរុស្ស៊ី កាលពីដើមខែមេសា មុនពេលមានបទឈប់បាញ់បណ្តោះអាសន្នរវាងវ៉ាស៊ីនតោននិងតេហេរ៉ង់។

ឯកអគ្គរដ្ឋទូតអាមេរិក លោក Mike Waltz បានសម្តែងជំនឿថា សំណើថ្មីដែលបង្រួមគម្រាតនេះ នឹងទទួលបានការគាំទ្រគ្រប់គ្រាន់ក្នុងក្រុមប្រឹក្សាសន្តិសុខ UN ដោយគ្មានការជំទាស់ឬវ៉េតូពីសម្ព័ន្ធមិត្តអ៊ីរ៉ង់ឡើយ។ រដ្ឋបាលលោកត្រាំកំពុងខិតខំស្តារសេរីភាពនាវាចរណ៍នៅច្រកសមុទ្រដែលដឹកជញ្ជូនប្រេងឆៅប្រមាណ ២០% នៃតម្រូវការសកល។ សេចក្តីព្រាងក៏ស្វាគមន៍កិច្ចខិតខំប្រឹងប្រែងកាត់បន្ថយជម្លោះ និងលើកទឹកចិត្តឱ្យរដ្ឋនានាពង្រឹងការសន្ទនាដើម្បីសន្តិភាពយូរអង្វែងក្នុងតំបន់។