By រាជធានីភ្នំពេញ ៖ បុរសវ័យក្មេងម្នាក់ដែលទើបក្លាយជាតួសម្ដែងថត MV ខ្លីៗ បែរជាយកសមត្ថភាពសម្ដែងមកប្រើប្រាស់ខុសកន្លែង ដោយបានឆក់ទូរស័ព្ទ iPhone 13 Pro Max របស់នារីម្នាក់ នៅវេលាម៉ោង ៥ និង ៤០ នាទី ទៀបភ្លឺ ឈានចូលថ្ងៃទី ៨ ខែ ឧសភា ឆ្នាំ ២០២៦ នៅចំណុចបុរីរុងរឿង ក្នុងទីក្រុង OCIC សង្កាត់ជ្រោយចង្វារ ខណ្ឌជ្រោយចង្វារ។
ជនសង្ស័យឈ្មោះ ចាន់ វាសនា ភេទប្រុស អាយុ ២១ឆ្នាំ ស្នាក់នៅសង្កាត់ជ្រោយចង្វារ បានជិះម៉ូតូហុងដាសេ១១០ ពណ៌ក្រហម គ្មានស្លាកលេខ ក្នុងគោលបំណងទៅកុងស៊ីកាប់ជ្រូក។ ពេលឃើញនារីរងគ្រោះឈប់ម៉ូតូនិយាយទូរស័ព្ទ ក៏ឆ្លៀតឱកាសមេឃមិនទាន់ភ្លឺ ធ្វើសកម្មភាពឆក់យកទូរស័ព្ទ រួចជិះគេចខ្លួនបាត់។
ប៉ុន្តែជាការអាសូរ ពេលជិះរត់គេចបានប្រហែលតែ ២០០ ម៉ែត្រប៉ុណ្ណោះ ម៉ូតូក៏អស់សាំងភ្លាម ដោយសារខ្លួនភ្លេចចាក់សាំងមុនចេញពីផ្ទះ។ នារីរងគ្រោះបានជិះម៉ូតូដេញតាមទាន់ ហើយស្រែកឲ្យប្រជាពលរដ្ឋជួយចាប់ខ្លួន។
ភ្លាមៗនោះ មហាជនបានអន្តរាគមន៍ដេញចាប់ខ្លួនបាន ហើយគាត់បានសុំកុំឲ្យវាយ ដោយនិយាយថាខ្លាចខូចមុខមិនបានថត MV ខ្លីៗតទៅទៀត។ ក្រោយពីត្រូវបានប្រគល់ទៅកងរាជអាវុធហត្ថខណ្ឌជ្រោយចង្វារ តាមរយៈលេខទូរស័ព្ទ ១២៩១ ជនសង្ស័យបានសារភាពកំហុសទាំងស្រុង និងត្រូវបាននាំយកទៅធ្វើការសាកសួរនៅមូលដ្ឋាន ដើម្បីចាត់ការតាមច្បាប់។
គួរបញ្ជាក់ថា នារីរងគ្រោះបានយកទូរស័ព្ទរបស់ខ្លួនមកវិញ និងបានទៅដាក់ពាក្យបណ្ដឹងនៅកងរាជអាវុធហត្ថបន្តទៀតផងដែរ។ រឿងរ៉ាវនេះជាមេរៀនសម្រាប់អ្នកដែលគិតថាអាចប្រព្រឹត្តបទល្មើសដោយមិនត្រូវបានផ្ដន្ទាទោស។
