By ទីក្រុងឌុយបៃ៖ ប្រទេសអ៊ីរ៉ង់ចេញសេចក្ដីព្រមានធ្ងន់ៗកាលពីយប់មិញ បន្ទាប់ពីនាវាដឹកប្រេងរបស់ខ្លួនមួយចំនួនរងការវាយប្រហារពីសំណាក់យោធាអាមេរិក។
ឆ្មាំបដិវត្តឥស្លាមប្រកាសថា រាល់ការវាយប្រហារនាពេលអនាគតទៅលើនាវាដឹកប្រេង ឬនាវាដឹកទំនិញដទៃទៀតរបស់ខ្លួន អាចនឹងត្រូវអ៊ីរ៉ង់វាយប្រហារសងសឹកវិញយ៉ាងធ្ងន់ធ្ងរ ដោយរួមទាំងការវាយប្រហារទៅលើមូលដ្ឋានយោធាអាមេរិកនៅមជ្ឈិមបូព៌ា និងនាវារបស់ពួកសត្រូវផងដែរ។
ទូរទស្សន៍រដ្ឋអ៊ីរ៉ង់ផ្សព្វផ្សាយការព្រមាននេះ មួយថ្ងៃបន្ទាប់ពីយោធាអាមេរិកវាយប្រហារនាវាដឹកប្រេង២គ្រឿងរបស់អ៊ីរ៉ង់ ដែលព្យាយាមបើកចេញពីការបិទខ្ទប់។
ទន្ទឹមនឹងនោះ ប្រទេសបារ៉ែន ដែលជាកន្លែងតាំងនៅនៃបញ្ជាការដ្ឋានកងទ័ពជើងទឹកអាមេរិកប្រចាំតំបន់មជ្ឈិមបូព៌ា បានថ្លែងថាខ្លួនចាប់ឃាត់មនុស្សរាប់សិបនាក់ ដែលសង្ស័យថាជាប់ពាក់ព័ន្ធនឹងឆ្មាំបដិវត្តឥស្លាម។ ក្រសួងមហាផ្ទៃបារ៉ែនបានបញ្ជាក់ថា ក្រោយស៊ើបអង្កេតឃើញពួកគេមានទំនាក់ទំនងជាមួយឆ្មាំបដិវត្តពិតប្រាកដ ដោយបានប្រមូលមូលនិធិ និងព្យាយាមផ្ញើទៅឱ្យឆ្មាំបដិវត្តដើម្បីគាំទ្រចលនាភេរវកម្ម។
ទីក្រុងវ៉ាស៊ីនតោនកំពុងរង់ចាំចម្លើយពីអ៊ីរ៉ង់ បន្ទាប់ពីខ្លួនបានបញ្ជូនផែនការសន្តិភាព១៤ចំណុច ដើម្បីបញ្ចប់សង្គ្រាម បើកច្រកសមុទ្រហ័រម៉ូសឡើងវិញ និងបិទបញ្ចប់កម្មវិធីនុយក្លេអ៊ែររបស់អ៊ីរ៉ង់។
លោកពូទីន ប្រធានាធិបតីរុស្ស៊ី បានថ្លែងថា ទីក្រុងម៉ូស្គូបានដាក់ចេញសំណើដើម្បីដឹកជញ្ជូនសារធាតុអ៊ុយរ៉ាញ៉ូមដែលចម្រាញ់រួចពីអ៊ីរ៉ង់ ដើម្បីជួយដោះស្រាយបញ្ហា។
អ៊ីរ៉ង់បានចេញសេចក្ដីព្រមានទៅប្រទេសបារ៉ែនថា ការដែលប្រទេសនេះចូលខាងក្រុមអាមេរិក អាចនឹងនាំទុក្ខដ៏ធ្ងន់ធ្ងរដាក់ខ្លួនជាមិនខាន។ លោកអេប្រាហ៊ីម អាហ្ស៊ីហ្ស៊ី ប្រធានគណៈកម្មការសន្តិសុខជាតិនៃរដ្ឋសភាអ៊ីរ៉ង់ បានបង្ហោះសារព្រមានថា «ច្រកសមុទ្រហ័រម៉ូសមានសារសំខាន់ជាអាយុជីវិត សូមកុំប្រថុយបិទច្រកនេះដោយខ្លួនឯង។»
ទោះជាមានភាពតានតឹងយ៉ាងនេះក្ដី គេកត់សម្គាល់ថា បទឈប់បាញ់នៅតែមាននៅឡើយទេ។
ប្រភព៖ អេភី និងប្រភពដទៃទៀត
