By ព្រឹកថ្ងៃទី១១ ខែឧសភា (ម៉ោងក្នុងស្រុក) ប្រទេសនេប៉ាល់បានជួបនូវហេតុការណ៍ដ៏គួរឱ្យព្រួយបារម្ភមួយ នៅពេលដែលយន្តហោះ Airbus A330 របស់ក្រុមហ៊ុនអាកាសចរណ៍ទួរគី (Turkish Airlines) បានឆេះកង់ចុះចតផ្នែកខាងស្តាំភ្លាមៗ ខណៈកំពុងចុះចតនៅអាកាសយានដ្ឋានអន្តរជាតិ Tribhuvan ក្នុងទីក្រុង Kathmandu ។
លោក Raj Kumar Silwal អ្នកនាំពាក្យការិយាល័យសន្តិសុខអាកាសយានដ្ឋាន បានឱ្យដឹងថា មានអ្នកដំណើរសរុបចំនួន ២៧៦នាក់ និងសមាជិកនាវិក ១១នាក់ ស្មើនឹងមនុស្សសរុបជិត ៣០០នាក់ ត្រូវបានជម្លៀសចេញពីយន្តហោះដោយសុវត្ថិភាពទាំងអស់គ្នា តាមរយៈច្រកចេញសង្គ្រោះបន្ទាន់។ ក្រុមពន្លត់អគ្គីភ័យបានចុះទៅដល់កន្លែងកើតហេតុភ្លាមៗ និងបានគ្រប់គ្រងស្ថានភាពភ្លើងបានយ៉ាងឆាប់រហ័ស ដោយមិនមានអ្នករងរបួស ឬស្លាប់បាត់បង់ជីវិតនោះទេ។
ទោះជាយ៉ាងណា ដោយសារឧប្បត្តិហេតុនេះកើតឡើងនៅលើផ្លូវរត់ បណ្តាលឱ្យប្រតិបត្តិការហោះឡើង និងចុះចតទាំងអស់នៅអាកាសយានដ្ឋានអន្តរជាតិ Tribhuvan ត្រូវបានរំខានជាបណ្តោះអាសន្នពេញមួយព្រឹក។ លោក Gyanendra Bhul មន្ត្រីព័ត៌មាននៃអាជ្ញាធរអាកាសចរណ៍ស៊ីវិលនេប៉ាល់ បានថ្លែងថា អាជ្ញាធរកំពុងប្រឹងប្រែងអូសយន្តហោះទៅកាន់ទីតាំងសុវត្ថិភាពផ្សេងទៀតក្នុងអាកាសយានដ្ឋាន ដើម្បីសម្អាតផ្លូវរត់ និងដំណើរការជើងហោះហើរឡើងវិញឱ្យបានឆាប់រហ័ស។
គួរបញ្ជាក់ផងដែរថា ប្រទេសនេប៉ាល់ត្រូវបានគេចាត់ទុកជាប្រទេសមួយដែលមានហានិភ័យខ្ពស់ក្នុងវិស័យអាកាសចរណ៍ ដោយសារតែលក្ខណៈភូមិសាស្ត្រដីភ្នំដ៏រដិបរដុប និងលក្ខខណ្ឌអាកាសធាតុប្រែប្រួលញឹកញាប់។ កាលពីឆ្នាំ ២០១៥ ក៏ធ្លាប់មានហេតុការណ៍ស្រដៀងគ្នានេះដែរ នៅពេលដែលយន្តហោះរបស់ក្រុមហ៊ុនអាកាសចរណ៍ទួរគីដដែលបានរអិលចេញពីផ្លូវរត់ ខណៈចុះចតក្នុងអ័ព្ទក្រាស់នៅទីក្រុង Kathmandu ដែលនាំឱ្យអាកាសយានដ្ឋានត្រូវបិទអស់រយៈពេលជាច្រើនថ្ងៃ ប៉ុន្តែសំណាងល្អមិនមានអ្នករងរបួសធ្ងន់ធ្ងរនោះទេ។ ជាសំណាងល្អម្តងទៀត ហេតុការណ៍ថ្មីនេះក៏បានបញ្ចប់ដោយគ្មានជនរងគ្រោះឡើយ៕
