By នៅមុនការយាងមកដល់ទីក្រុងប៉េកាំងរបស់ប្រធានាធិបតីអាមេរិក លោក ដូណាល់ ត្រាំ ប្រព័ន្ធផ្សព្វផ្សាយរដ្ឋចិនបានចាប់ផ្ដើមបញ្ចេញនូវសារយ៉ាងច្បាស់លាស់មួយចំនួន។ តាមរយៈអត្ថបទវិភាគនិងមតិយោបល់ជាបន្តបន្ទាប់ ថ្នាក់ដឹកនាំចិនបានបង្ហាញពីបំណងចង់«ចាប់ផ្ដើមទំនាក់ទំនងឡើងវិញ» ជាមួយសហរដ្ឋអាមេរិក ប៉ុន្តែនៅក្រោមលក្ខខណ្ឌតឹងរ៉ឹង។
ទោះបីមានការអំពាវនាវឱ្យមានទំនាក់ទំនងល្អប្រសើរនិងសង្កត់ធ្ងន់លើផលប្រយោជន៍រួមនៃសេដ្ឋកិច្ចពិភពលោកក៏ដោយ ក៏ទីក្រុងប៉េកាំងនៅតែប្រកាន់ខ្ជាប់នូវគោលការណ៍គ្រឹះរបស់ខ្លួន។ ចិនបានដាស់តឿនជាថ្មីអំពី «ខ្សែបន្ទាត់ក្រហម» ចំនួន ៤ ដែលសហរដ្ឋអាមេរិកមិនត្រូវរំលងដាច់ខាត រួមមាន៖ ១. បញ្ហាកោះតៃវ៉ាន់ ២. បញ្ហាប្រជាធិបតេយ្យនិងសិទ្ធិមនុស្ស ៣. ប្រព័ន្ធនយោបាយរបស់ចិន និង ៤. សិទ្ធិក្នុងការអភិវឌ្ឍរបស់ចិន ដែលរួមទាំងផ្នែកបច្ចេកវិទ្យាផងដែរ។
ទោះមានដែនកំណត់ទាំងនេះ បរិយាកាសក្នុងសារព័ត៌មានរដ្ឋចិនវិញហាក់មានភាពវិជ្ជមាន។ កាសែត People’s Daily ដែលជាសារព័ត៌មានផ្លូវការរបស់បក្សកុម្មុយនិស្តចិន បានសរសេរថា «ទំនាក់ទំនងចិន-អាមេរិក ប្រហែលជាមិនអាចវិលត្រឡប់ទៅរកភាពដើមវិញបានទេ ប៉ុន្តែវាអាចបោះជំហានទៅរកអនាគតដ៏ប្រសើរជាងមុនបាន»។
ទន្ទឹមនេះ ទីភ្នាក់ងារព័ត៌មាន Xinhua បានសង្កត់ធ្ងន់លើចំណងសេដ្ឋកិច្ចដ៏រឹងមាំ ដោយលើកឡើងថា មហាអំណាចសេដ្ឋកិច្ចទាំងពីរមានទំនាក់ទំនងគ្នាយ៉ាងជិតស្និទ្ធមិនអាចកាត់ផ្ដាច់បាន ជាពិសេសខ្សែសង្វាក់ផ្គត់ផ្គង់សកល។ នេះបង្ហាញថា ចិនកំពុងព្យាយាមស្វែងរកចំណុចរួមដើម្បីជំរុញកិច្ចសហប្រតិបត្តិការសេដ្ឋកិច្ច ខណៈរក្សាជំហររឹងមាំលើអធិបតេយ្យភាពជាតិ។
