ភ្ញាក់ផ្អើល! ចិនរៀបពិធីស្វាគមន៍យ៉ាងអធិកអធម ទទួលប្រធានាធិបតីត្រាំ នៅទីក្រុងប៉េកាំង

នៅព្រឹកថ្ងៃទី១៤ ខែឧសភា ម៉ោង ១០:០០ នៅទីក្រុងប៉េកាំង (ស្មើនឹងម៉ោង ៩:០០ ព្រឹក ម៉ោងនៅកម្ពុជា) ប្រធានាធិបតីចិន ស៊ី ជីនពីង បានធ្វើជាអធិបតីក្នុងពិធីស្វាគមន៍ដ៏អស្ចារ្យមួយ ដើម្បីទទួលប្រធានាធិបតីអាមេរិក លោក ដូណាល់ ត្រាំ នៅខាងមុខសាលប្រជុំប្រជាជន ក្នុងក្រុងប៉េកាំង។

យោងតាមទីភ្នាក់ងារសារព័ត៌មានស៊ីនហួ ដំណើរទស្សនកិច្ចផ្លូវរដ្ឋរបស់លោក ត្រាំ ទៅកាន់ប្រទេសចិន ធ្វើឡើងចាប់ពីថ្ងៃទី១៣ ដល់ទី១៥ ខែឧសភា តាមការអញ្ជើញរបស់ប្រធានាធិបតី ស៊ី ជីនពីង។ នេះជាដំណើរទស្សនកិច្ចលើកដំបូងរបស់ប្រធានាធិបតីអាមេរិកទៅកាន់ចិន ក្នុងរយៈពេលជិត ៩ ឆ្នាំ និងជាលើកទីពីររបស់លោក ត្រាំ ចាប់តាំងពីឆ្នាំ២០១៧។

មេដឹកនាំទាំងពីរត្រូវបានគេរំពឹងថានឹងពិភាក្សាលើបញ្ហាសំខាន់ៗក្នុងទំនាក់ទំនងទ្វេភាគី រួមមាន អ៊ីរ៉ង់ ពាណិជ្ជកម្ម និងតៃវ៉ាន់។ លោក ត្រាំ បានហោះហើរមកដល់ទីក្រុងប៉េកាំងដោយយន្តហោះ Air Force One នៅល្ងាចថ្ងៃទី១៣ ខែឧសភា ដោយមានអ្នកធុរកិច្ចកំពូលៗអមដំណើរ ដូចជាលោក Jensen Huang នាយកប្រតិបត្តិក្រុមហ៊ុន Nvidia និងមហាសេដ្ឋី Elon Musk។

អ្នកសង្កេតការណ៍ចិនរំពឹងថាកិច្ចប្រជុំនេះនឹងកំណត់ទិសដៅទំនាក់ទំនងចិន-អាមេរិកនាពេលខាងមុខ ដោយសង្ឃឹមថាមហាអំណាចទាំងពីរអាចពង្រីកការសន្ទនា និងកិច្ចសហប្រតិបត្តិការ លើកកម្ពស់របៀបវារៈវិជ្ជមាន និងគ្រប់គ្រងភាពខុសគ្នាឱ្យបានត្រឹមត្រូវ។

កាលវិភាគលម្អិត

ថ្ងៃទី ១៤ ឧសភា៖
ម៉ោង ១០:០០ ព្រឹក៖ ពិធីស្វាគមន៍
ម៉ោង ១០:១៥ ព្រឹក៖ កិច្ចចរចាទ្វេភាគី
ម៉ោង ៦:០០ ល្ងាច៖ ពិធីជប់លៀងរដ្ឋ
(ចន្លោះពេល៖ ទស្សនាប្រាសាទឋានសួគ៌)

ថ្ងៃទី ១៥ ឧសភា៖
ម៉ោង ១១:៣០ ព្រឹក៖ ថតរូបមិត្តភាព
ម៉ោង ១១:៤០ ព្រឹក៖ ទទួលទានតែ
ម៉ោង ១២:១៥ ថ្ងៃត្រង់៖ អាហារថ្ងៃត្រង់
រសៀល៖ លោក ត្រាំ វិលត្រឡប់ទៅសហរដ្ឋអាមេរិកវិញ