By ព្រឹត្តិការណ៍មួយដែលធ្វើឱ្យអ្នកនយោបាយនិងអ្នកសារព័ត៌មានភ្ញាក់ផ្អើលបានកើតឡើង កាលពីពេលថ្មីៗនេះ នៅក្នុងវិមានប្រជាជនទីក្រុងប៉េកាំង។ លោក ម៉ាកូ រូប៊ីយ៉ូ (Marco Rubio) រដ្ឋមន្ត្រីការបរទេសអាមេរិក ដែលធ្លាប់ត្រូវបានរដ្ឋាភិបាលចិនដាក់ទណ្ឌកម្មដល់ទៅពីរលើក បានបង្ហាញខ្លួនអមដំណើរប្រធានាធិបតី ដូណាល់ ត្រាំ ក្នុងជំនួបកំពូលជាមួយមេដឹកនាំចិន។
សំណួរដែលគ្រប់គ្នាចោទសួរគឺ៖ តើហេតុអ្វីបានជាលោក រូប៊ីយ៉ូ ដែលស្ថិតក្នុងបញ្ជីទណ្ឌកម្មចិន អាចដើរចូលទៅក្នុងទឹកដីចិនដោយគ្មានបញ្ហាអ្វី?
តាមការចុះផ្សាយរបស់សារព័ត៌មាន Al Jazeera នៅថ្ងៃទី១៤ ខែឧសភា ភាគីចិនបានប្រើប្រាស់ «ល្បិចបច្ចេកទេស» ដ៏ឆ្លាតវៃមួយ។ ពោលគឺ ចិនបានប្តូរអក្ខរាវិរុទ្ធឈ្មោះរបស់លោក រូប៊ីយ៉ូ ជាភាសាចិននៅក្នុងឯកសារផ្លូវការ ពី Lubi ao (ដែលមានក្នុងបញ្ជីទណ្ឌកម្ម) ទៅជា Lu biao (ឈ្មោះថ្មី) ដើម្បីជម្នះឧបសគ្គផ្លូវច្បាប់ដែលខ្លួនបានបង្កើតឡើង។
ការប្រើប្រាស់ល្បិចកលតាមបែបការទូតបែបនេះ បានឆ្លុះបញ្ចាំងថា ទោះបីមានភាពតានតឹងយ៉ាងណាក៏ដោយ ក៏ទាំងអាមេរិក និងចិន នៅតែមានឆន្ទៈរំលងបញ្ហាផ្ទាល់ខ្លួន ដើម្បីផ្តោតលើកិច្ចពិភាក្សាសកលសំខាន់ៗ ដូចជា សេដ្ឋកិច្ច និងសន្តិសុខ។ នេះជាភស្តុតាងដែលបង្ហាញថា ផលប្រយោជន៍ជាតិតែងតែធំជាងការប្រកាន់ខ្ជាប់នូវបញ្ជីទណ្ឌកម្មចាស់ៗ។
