ណេតាន់យ៉ាហ៊ូ ប្រកាសអ៊ីស្រាអែលគ្រប់គ្រងហ្គាហ្សាជាង ៦០% ហួសកិច្ចព្រមព្រៀងឈប់បាញ់

កាសែត Haaretz របស់អ៊ីស្រាអែលបានចេញផ្សាយកាលពីថ្ងៃសុក្រថា នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ បានទទួលស្គាល់ថា បច្ចុប្បន្នអ៊ីស្រាអែលកំពុងគ្រប់គ្រងតំបន់ហ្គាហ្សាប្រហែល ៦០% ដែលជាតួលេខលើសពីទឹកដីដែលបានកំណត់ក្រោមកិច្ចព្រមព្រៀងឈប់បាញ់កាលពីឆ្នាំមុន។

លោក ណេតាន់យ៉ាហ៊ូ បានលើកឡើងក្នុងឱកាសប្រារព្ធខួបនៃការកាន់កាប់ទីក្រុងយេរូសាឡឹមខាងកើតថា៖ «សព្វថ្ងៃនេះ យើងគ្រប់គ្រងប្រហែល ៦០% នៃតំបន់ហ្គាហ្សា»។ តួលេខនេះលើសពីតំបន់ដែលបានគ្រោងទុកក្រោមកិច្ចព្រមព្រៀងឈប់បាញ់ដែលសម្របសម្រួលដោយសហរដ្ឋអាមេរិក ចូលជាធរមានក្នុងខែតុលា ឆ្នាំ២០២៥ ដែលអ៊ីស្រាអែលគ្រប់គ្រងត្រឹមប្រហែល ៥៣% ប៉ុណ្ណោះ។

យោងតាមមន្ត្រីប៉ាឡេស្ទីន និងក្រុមសិទ្ធិមនុស្ស កងកម្លាំងអ៊ីស្រាអែលបានពង្រីកខ្លួនបន្តិចម្តងៗហួសពីខ្សែបន្ទាត់កំណត់ព្រំដែនដើម ទៅកាន់តំបន់បន្ថែមទៀតជ្រៅក្នុងតំបន់ហ្គាហ្សា រហូតដល់ខ្សែបន្ទាត់ពណ៌ទឹកក្រូច។ ប្រភពព័ត៌មានក្នុងស្រុកបានឱ្យដឹងថា រថយន្តឈូសឆាយយោធាអ៊ីស្រាអែលបានរំកិលជាបន្តបន្ទាប់ទៅទិសខាងលិច តាមបណ្តោយផ្លូវ Salah al-Din ក្នុងតំបន់ Netzarim កណ្តាលហ្គាហ្សា។

ទីភ្នាក់ងារ Haaretz បានដកស្រង់សម្តីអ្នកជំនាញភូមិសាស្ត្រ លោកស្រី Lori Bouvier ថា ទឹកដីគ្រប់គ្រងដោយអ៊ីស្រាអែលបានពង្រីកពីប្រហែល ៥៣% ក្នុងខែតុលា ដល់ ៥៧-៥៨% នាពេលបច្ចុប្បន្ន។ លោកស្រីបន្ថែមថា នៅពេលរួមបញ្ចូលតំបន់ខ្សែបន្ទាត់ពណ៌ទឹកក្រូច អ៊ីស្រាអែលបានគ្រប់គ្រងជាង ៦០% នៃតំបន់ហ្គាហ្សាប្រកបដោយប្រសិទ្ធភាព។

មន្ត្រីជាន់ខ្ពស់ហាម៉ាស លោក Bassem Naim បានប្រាប់សារព័ត៌មាន Anadolu ថា អ៊ីស្រាអែលបានផ្លាស់ប្តូរខ្សែបន្ទាត់ពណ៌លឿងទៅខាងលិចបន្ថែម ៨-៩% បង្កើនផ្ទៃដីសរុបក្រោមការគ្រប់គ្រងរបស់អ៊ីស្រាអែលដល់ជាង ៦០% នៃតំបន់នោះ។