By សហរដ្ឋអារ៉ាប់រួម (UAE) បានចេញសេចក្តីថ្លែងការណ៍យ៉ាងដាច់អហង្ការកាលពីថ្ងៃសុក្រទី១៥ ខែឧសភា ដោយបានបដិសេធទាំងស្រុងចំពោះការចោទប្រកាន់របស់អ៊ីរ៉ង់ ជុំវិញករណី «ការវាយប្រហារភេរវកម្ម» ដែលបានកំណត់គោលដៅលើទឹកដីរបស់ខ្លួន និងបណ្តាប្រទេសដទៃទៀតនៅមជ្ឈិមបូព៌ា។
អ្នកស្រី សាង ស្រីល័ក្ខ ជាអ្នករាយការណ៍ពីសារព័ត៌មាន Emirates News Agency បានឲ្យដឹងថា នៅក្នុងកិច្ចប្រជុំរដ្ឋមន្ត្រីការបរទេសនៃក្រុមប្រទេស BRICS ប្រចាំនៅឥណ្ឌា លោក Khalifa Shaheen Al Marar រដ្ឋមន្ត្រីរដ្ឋនៃ UAE បានសង្កត់ធ្ងន់ជាថ្មីអំពីការបដិសេធចំពោះរាល់ការចោទប្រកាន់ ឬការគំរាមកំហែងណាដែលប៉ះពាល់ដល់អធិបតេយ្យភាព សន្តិសុខជាតិ និងការសម្រេចចិត្តឯករាជ្យរបស់ UAE។
លោក Al Marar បានប្រកាសយ៉ាងម៉ឺងម៉ាត់ថា UAE រក្សាសិទ្ធិពេញលេញទាំងផ្នែកអធិបតេយ្យភាព ច្បាប់ ការទូត និងយោធា ដើម្បីឆ្លើយតបទៅនឹងរាល់ការគំរាមកំហែង ឬសកម្មភាពអរិភាពនានា។ លោកបានថ្លែងទៅកាន់សមាជិកប្លុក BRICS ថា៖ «ការប៉ុនប៉ងបង្ខិតបង្ខំ ការចោទប្រកាន់ខុស ឬការបំភាន់ដោយគំនិតអាក្រក់ នឹងមិនអាចធ្វើឲ្យរង្គោះរង្គើដល់ជំហររឹងមាំរបស់ UAE បានឡើយ»។
តំណាងជាន់ខ្ពស់រូបនេះក៏បានព្រមានទៅវិញដែរថា UAE មិនមែនជាប្រទេសទន់ខ្សោយដែលត្រូវស្វែងរកការការពារពីបរទេសនោះទេ ពោលគឺរដ្ឋាភិបាលមានសមត្ថភាពការពារខ្លួន និងបូរណភាពទឹកដីយ៉ាងពេញលេញ។ ការអត្ថាធិប្បាយដ៏តឹងសរសៃកនេះ បានបង្ហាញពីភាពតានតឹងផ្នែកភូមិសាស្ត្រនយោបាយកាន់តែខ្លាំងឡើងនៅមជ្ឈិមបូព៌ា ចំពេលដែលអ៊ីរ៉ង់កំពុងរងការរិះគន់ពីបណ្តាប្រទេសជិតខាងជុំវិញការគាំទ្រដល់ក្រុមប្រដាប់អាវុធនៅក្នុងតំបន់។
