វិបត្តិមជ្ឈិមបូព៌ា៖ យន្តហោះអាមេរិកដឹកគ្រាប់រំសេវរាប់សិបគ្រឿងចុះចតនៅអ៊ីស្រាអែល ត្រៀមប្រតិបត្តិការយោធាប្រឆាំងអ៊ីរ៉ង់

ភាពតានតឹងនៅមជ្ឈិមបូព៌ាកំពុងឡើងកម្តៅខ្លាំង បន្ទាប់ពីយន្តហោះដឹកជញ្ជូនយោធាអាមេរិករាប់សិបគ្រឿង ដែលផ្ទុកដោយគ្រាប់រំសេវ និងសម្ភារៈសង្គ្រាមពីមូលដ្ឋានទ័ពនៅប្រទេសអាល្លឺម៉ង់ បានចុះចតនៅអ៊ីស្រាអែលក្នុងរយៈពេល ២៤ ម៉ោងចុងក្រោយនេះ។

ប្រព័ន្ធផ្សព្វផ្សាយអ៊ីស្រាអែល ដូចជាប៉ុស្តិ៍លេខ ១៣ បានផ្តល់ព័ត៌មានថា ការដឹកជញ្ជូនទ្រង់ទ្រាយធំនេះគឺជាផ្នែកមួយនៃការត្រៀមលក្ខណៈសម្រាប់ការបន្តប្រតិបត្តិការយោធាឡើងវិញ ដែលអាចនឹងកើតមានប្រឆាំងនឹងអ៊ីរ៉ង់។ កាសែត The Times of India ក៏បានចុះផ្សាយកាលពីថ្ងៃទី ១៨ ខែឧសភាថា សហរដ្ឋអាមេរិកបានបង្កើនការហោះហើរដឹកជញ្ជូនយោធាទៅកាន់អ៊ីស្រាអែលយ៉ាងខ្លាំងក្នុងអំឡុងពេលនៃភាពតានតឹងក្នុងតំបន់។

កាសែត The New York Times ដកស្រង់ប្រភពព័ត៌មានថ្នាក់ដឹកនាំបានរាយការណ៍កាលពីថ្ងៃទី ១៥ ខែឧសភាថា ទីក្រុងវ៉ាស៊ីនតោន និងទីក្រុងតេអាវីវកំពុងរៀបចំយ៉ាងសកម្មសម្រាប់លទ្ធភាពនៃការវាយប្រហារជាថ្មីលើអ៊ីរ៉ង់។ ប្រភពដដែលបានបញ្ជាក់ថា ទីប្រឹក្សារបស់លោកប្រធានាធិបតីដូណាល់ ត្រាំបានបង្កើតជម្រើសជាច្រើនសម្រាប់ប្រតិបត្តិការយោធា រួមទាំងការវាយប្រហារតាមអាកាសទ្រង់ទ្រាយធំ និងការដាក់ពង្រាយកងកម្លាំងពិសេសលើដី ដើម្បីរឹបអូសយកអ៊ុយរ៉ាញ៉ូមដែលចម្រាញ់រួចនៅរោងចក្រនុយក្លេអ៊ែររបស់អ៊ីរ៉ង់។

របាយការណ៍បន្ថែមទៀតបានឲ្យដឹងថា មន្ត្រីយោធាជាន់ខ្ពស់អ៊ីស្រាអែល និងបញ្ជាការកណ្តាលសហរដ្ឋអាមេរិក (CENTCOM) បានធ្វើកិច្ចពិគ្រោះយោបល់គ្នាជាបន្តបន្ទាប់ក្នុងរយៈពេលប៉ុន្មានថ្ងៃចុងក្រោយនេះ។ នាយករដ្ឋមន្ត្រីអ៊ីស្រាអែល លោក Benjamin Netanyahu បានសង្កត់ធ្ងន់ម្តងហើយម្តងទៀតអំពីបំណងបន្តប្រតិបត្តិការយោធាប្រឆាំងនឹងអ៊ីរ៉ង់ ខណៈដែលលោកត្រាំពុំទាន់សម្រេចចិត្តជាផ្លូវការនៅឡើយទេ។

ការវិវត្តន៍ថ្មីៗនេះ ធ្វើឲ្យសហគមន៍អន្តរជាតិកំពុងតាមដានយ៉ាងដិតដល់នូវស្ថានការណ៍នៅមជ្ឈិមបូព៌ា ដែលអាចផ្ទុះឡើងជាជម្លោះទ្រង់ទ្រាយធំគ្រប់ពេល៕