By អង្គការសហប្រជាជាតិ (UN) បានចេញរបាយការណ៍ថ្មីមួយកាលពីថ្ងៃចន្ទ ដោយទាមទារឱ្យអ៊ីស្រាអែលចាត់វិធានការជាបន្ទាន់ដើម្បីទប់ស្កាត់អំពើប្រល័យពូជសាសន៍នៅតំបន់ហ្គាហ្សា ព្រមទាំងថ្កោលទោសយ៉ាងខ្លាំងចំពោះការសម្អាតជនជាតិភាគតិចនៅតំបន់ West Bank ។
ប្រធានសិទ្ធិមនុស្សរបស់អង្គការសហប្រជាជាតិ លោក Volker Turk បានអំពាវនាវឱ្យអ៊ីស្រាអែលអនុវត្តតាមបញ្ជារបស់តុលាការយុត្តិធម៌អន្តរជាតិឆ្នាំ២០២៤ ដែលតម្រូវឱ្យចាត់វិធានការទប់ស្កាត់អំពើប្រល័យពូជសាសន៍នៅហ្គាហ្សា។
របាយការណ៍របស់UN បានចោទប្រកាន់ថា ការបំផ្លិចបំផ្លាញដោយចេតនានិងខុសច្បាប់លើតំបន់ហ្គាហ្សា ព្រមទាំងការបោសសម្អាតជំរំជនភៀសខ្លួននៅWest Bank គឺជាសញ្ញាច្បាស់លាស់ថាអ៊ីស្រាអែលមានបំណងធ្វើឱ្យការផ្លាស់ទីលំនៅរបស់ប្រជាជនប៉ាឡេស្ទីនក្លាយជាអចិន្ត្រៃយ៍។
របាយការណ៍បានបញ្ជាក់ទៀតថា សកម្មភាពរបស់អ៊ីស្រាអែលចាប់តាំងពីខែតុលា ឆ្នាំ២០២៣ មក ពាក់ព័ន្ធនឹងការរំលោភបំពានយ៉ាងធ្ងន់ធ្ងរលើច្បាប់អន្តរជាតិ ដោយមានករណីជាច្រើនក្លាយទៅជាឧក្រិដ្ឋកម្មសង្គ្រាម និងឧក្រិដ្ឋកម្មឃោរឃៅផ្សេងៗទៀត។ ការរំលោភបំពានម្តងហើយម្តងទៀតនេះ បង្ហាញពីគោលបំណងដាក់ទណ្ឌកម្មរួមលើប្រជាជនប៉ាឡេស្ទីន និងការបង្ខំឱ្យផ្លាស់ទីលំនៅ ដែលស្មើនឹងអំពើសម្អាតជនជាតិភាគតិច។
