By កីឡាករយុវវ័យទេពកោសល្យរបស់ Barcelona និងតំណាងក្រុមជម្រើសជាតិអេស្ប៉ាញ Lamine Yamal ត្រូវបានបញ្ជាក់ថានឹងអវត្តមានក្នុងរដូវកាល La Liga ដែលនៅសល់ បន្ទាប់ពីទទួលរបួសសរសៃពួរជើងឆ្វេងធ្ងន់ធ្ងរ។ ទោះជាយ៉ាងណា ក្លឹបសង្ឃឹមថាគាត់នឹងមានសុខភាពគ្រប់គ្រាន់សម្រាប់ការប្រកួត World Cup ខាងមុខនេះ។
របួសនេះកើតឡើងក្នុងជំនួបដែល Barcelona ឈ្នះ Celta Vigo 1-0 កាលពីថ្ងៃពុធ។ នៅនាទីទី៤០ Yamal បានស៊ុតបាល់ប៉េណាល់ទីឱ្យក្រុមនាំមុខ ប៉ុន្តែភ្លាមៗនោះគាត់បានដួលទៅនឹងដីដោយគៀបសរសៃពួរឆ្វេងរបស់គាត់ ហើយត្រូវបុគ្គលិកពេទ្យជួយចេញពីទីលានយ៉ាងប្រញាប់ប្រញាល់។
ក្លឹប Barcelona បានចេញសេចក្តីថ្លែងការណ៍កាលពីថ្ងៃព្រហស្បតិ៍បញ្ជាក់ពីរបួស និងបានឱ្យដឹងថា Yamal នឹងសម្រាកព្យាបាល និងខកខានការប្រកួតលីកដែលនៅសល់ ប៉ុន្តែរំពឹងថានឹងជាសះស្បើយទាន់ពេលវេលាសម្រាប់ព្រឹត្តិការណ៍ World Cup ។
កីឡាករវ័យ១៨ឆ្នាំរូបនេះក៏បានបង្ហោះសារមួយនៅលើ Instagram ដោយសារភាពថា៖ «របួសនេះធ្វើឱ្យខ្ញុំចេញពីទីលាននៅពេលដែលខ្ញុំចង់បានបំផុត ហើយវាឈឺចាប់ជាងខ្ញុំអាចពន្យល់បាន។ វាឈឺចាប់ណាស់ដែលមិនអាចប្រយុទ្ធជាមួយមិត្តរួមក្រុមរបស់ខ្ញុំ មិនអាចជួយបាននៅពេលដែលក្រុមត្រូវការខ្ញុំ។ ប៉ុន្តែខ្ញុំជឿជាក់លើពួកគេ ហើយខ្ញុំដឹងថាពួកគេនឹងពង្រឹងស្មារតីរបស់ពួកគេនៅគ្រប់ការប្រកួត»។
បច្ចុប្បន្ន Barcelona កំពុងឈរនៅកំពូលតារាង La Liga ដោយមាន៩ពិន្ទុដាច់ពីគូប្រជែង Real Madrid ហើយពួកគេនឹងជួបគ្នានៅថ្ងៃទី១០ ខែឧសភា នៅឯទឹកដីរបស់ Barça ដែលជាការប្រកួតមួយក្នុងចំណោម៦ប្រកួតចុងក្រោយរបស់ពួកគេ។
រីឯក្រុមជម្រើសជាតិអេស្ប៉ាញនឹងចាប់ផ្តើមយុទ្ធនាការ World Cup របស់ពួកគេក្នុងពូល H ទល់នឹង Cape Verde នៅថ្ងៃទី១៥ ខែមិថុនា បន្ទាប់មកប៉ះអារ៉ាប៊ីសាអូឌីត នៅថ្ងៃទី២១ ខែមិថុនា និងអ៊ុយរូហ្គាយ នៅថ្ងៃទី២៧ ខែមិថុនា៕
