By រាជធានីភ្នំពេញ៖ រថយន្តយីឌុបដឹកផ្លែស្វាយ១គ្រឿង បានបើកក្នុងល្បឿនលឿន ជ្រុលទៅបុកម៉ូតូ១គ្រឿងពីក្រោយពេញទំហឹង ខណៈម៉ូតូនោះកំពុងឈប់រង់ចាំភ្លើងស្តុបពណ៌ក្រហម បណ្ដាលឱ្យឆេះសន្ធោសន្ធៅ និងអ្នកបើកបររថយន្តបានរត់គេចខ្លួនបាត់។
ឧប្បត្តិហេតុនេះបានកើតឡើងកាលពីវេលាម៉ោង៦និង១៥នាទីព្រឹក ថ្ងៃទី០៣ ខែឧសភា ឆ្នាំ២០២៦ នៅតាមមហាវិថីស៊ីជីនពីង ត្រង់ចំណុចភ្លើងស្តុបគងនយ ស្ថិតក្នុងសង្កាត់គងនយ ខណ្ឌដង្កោ រាជធានីភ្នំពេញ។
តាមប្រភពព័ត៌មានពីសមត្ថកិច្ច បុរស២នាក់ជិះម៉ូតូហុងដាឌ្រីមសេ១២៥ ពណ៌ខ្មៅ ពាក់ស្លាកលេខកណ្ដាល 1P-8457 បានធ្វើដំណើរតាមផ្លូវក្រវាត់ក្រុងទី៣ ទិសដៅពីជើងទៅត្បូង លុះដល់ភ្លើងស្តុបក្រហមក៏ឈប់រង់ចាំ ស្រាប់តែរថយន្តដឹកស្វាយបើកមកបុកពីក្រោយយ៉ាងពេញទំហឹង។
អ្នកជិះម៉ូតូខាងក្រោយមើលឃើញទាន់ក៏លោតចេញរងរបួសស្រាល រីឯអ្នកបើកបរម៉ូតូត្រូវបុកខ្ទាតផ្ទប់ថ្នល់រងរបួសធ្ងន់ធ្ងរ។
រថយន្តបានអូសម៉ូតូជាប់ក្រោមចម្ងាយប្រមាណជាង១០០ម៉ែត្រ បណ្ដាលឱ្យបែកផ្កាភ្លើងឆាបឆេះទាំងរថយន្ត និងម៉ូតូសន្ធោសន្ធៅ។ ក្បាលរថយន្តសណ្ដោងនិងម៉ូតូត្រូវភ្លើងឆេះខូចខាតទាំងស្រុង។
ក្រោយកើតហេតុអ្នកបើកបររថយន្តបានចុះរត់គេចខ្លួនបាត់ស្រមោល។ កម្លាំងនគរបាលខណ្ឌដង្កោ និងរថយន្តពន្លត់អគ្គិភ័យបានចេញទៅអន្តរាគមន៍បាញ់ទឹកពន្លត់ភ្លើងរលត់ទៅវិញ។
រថយន្តនោះមានកន្ទុយរ៉ឺម៉កពាក់ស្លាកលេខកំពង់ចាម 4A-1254 ចំណែកក្បាលសណ្ដោងត្រូវភ្លើងឆេះខូចអស់មើលមិនដឹងស្លាកលេខ។ បុរសរបួសធ្ងន់ត្រូវបានបញ្ជូនទៅសង្គ្រោះភ្លាមៗ។
ក្រោយពេលកើតហេតុ នគរបាលចរាចរណ៍ខណ្ឌដង្កោ បានរាយការណ៍ទៅកាន់ការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញ ដើម្បីចុះវាស់វែង និងនាំយករថយន្តនិងម៉ូតូទៅរក្សាទុករង់ចាំដោះស្រាយតាមច្បាប់នៅពេលក្រោយ។
