By អាជ្ញាធរខេត្តបន្ទាយមានជ័យ បន្តយុទ្ធនាការបង្ក្រាបបទល្មើសឆបោកតាមប្រព័ន្ធបច្ចេកវិទ្យា (Online Scam) ដោយបានចាប់ខ្លួនជនបរទេសជាង ៤,០០០នាក់ និងរឹបអូសសម្ភារពាក់ព័ន្ធមួយចំនួនធំ។
ប្រតិបត្តិការនេះធ្វើឡើងក្រោមការបញ្ជាផ្ទាល់ពីឯកឧត្តម អ៊ុំ រាត្រី អភិបាលខេត្ត និងការសម្របសម្រួលនីតិវិធីដោយឯកឧត្តម កើត សុវណ្ណរ៉េត ព្រះរាជអាជ្ញាអមសាលាដំបូងខេត្ត ដោយមានកម្លាំងនគរបាលខេត្ត កងរាជអាវុធហត្ថ និងអាជ្ញាធរមូលដ្ឋានចូលរួម។
អាជ្ញាធរខេត្តបានចាត់តាំងក្រុមការងារចម្រុះដឹកនាំដោយលោក ប្រាក់ ប៉ូលី និងលោក លៀម សុដា អភិបាលរងខេត្ត ដើម្បីចុះត្រួតពិនិត្យ និងបង្ក្រាបទីតាំងសង្ស័យតាមអគារនានា។
យុទ្ធនាការនេះអនុវត្តស្របតាមបទបញ្ជាលេខ ០១ បប ចុះថ្ងៃទី១៤ ខែកក្កដា ឆ្នាំ២០២៥ អនុក្រឹត្យលេខ ០៣ អនក្រ.បក ចុះថ្ងៃទី៥ ខែមករា ឆ្នាំ២០២៦ និងផែនការសកម្មភាពលេខ ០១០/២៦ របស់គណៈបញ្ជាការឯកភាពរដ្ឋបាលខេត្ត។
ចាប់តាំងពីថ្ងៃទី១២ ខែមីនា ឆ្នាំ២០២៦ មក កម្លាំងសមត្ថកិច្ចបានសហការជាមួយថ្នាក់ជាតិចុះបង្ក្រាបទីតាំងសរុបចំនួន ៥កន្លែង ឃាត់ខ្លួនជនបរទេសខុសច្បាប់ចំនួន ៣,៨៥៣នាក់ (ភាគច្រើនជាជនជាតិចិន) នៅស្រុកម៉ាឡៃ និងក្រុងប៉ោយប៉ែត។ បន្ថែមពីនេះ ក្រុមការងារចម្រុះខេត្តក៏បានចុះបង្ក្រាបបន្ថែម ៣ទីតាំងទៀត ឃាត់ខ្លួនជនសង្ស័យជនជាតិចិន ១៦១នាក់។
នៅថ្ងៃទី០៣ ខែឧសភា ឆ្នាំ២០២៦ កម្លាំងសមត្ថកិច្ចបានបន្តប្រតិបត្តិការនៅក្រុងប៉ោយប៉ែតចំនួន ៣ទីតាំងទៀត រកឃើញជនបរទេសគ្មានឯកសារ ១៨៥នាក់ (ឥណ្ឌូនេស៊ី ១៥៤នាក់ និងថៃ ៣១នាក់) ព្រមទាំងរឹបអូសវត្ថុតាងពាក់ព័ន្ធ។ សរុបអាជ្ញាធរបានចាប់ខ្លួនជនបរទេសលើសពី ៤,០០០នាក់។
ក្រុមការងារចម្រុះខេត្តក៏បានចុះត្រួតពិនិត្យទីតាំងរស់នៅប្រមូលផ្តុំចំនួន ៩កន្លែង នៅក្រុងប៉ោយប៉ែត ស្រុកអូរជ្រៅ និងស្រុកម៉ាឡៃ ដោយណែនាំម្ចាស់ទីតាំងឲ្យធ្វើកិច្ចសន្យាគោរពច្បាប់។ ទីតាំងទាំងនេះមានជនបរទេសសរុប ៣០៣នាក់ (ស្ត្រី ១២នាក់)។
អាជ្ញាធរខេត្តបន្ទាយមានជ័យបញ្ជាក់ថា នឹងបន្តពង្រឹងវិធានការបង្ក្រាប និងត្រួតពិនិត្យឲ្យបានតឹងរឹងបន្ថែមទៀត ដើម្បីទប់ស្កាត់ និងបំបាត់បទល្មើសឆបោកតាមប្រព័ន្ធបច្ចេកវិទ្យា ដែលកំពុងក្លាយជាបញ្ហាប្រឈមសម្រាប់សង្គម និងសន្តិសុខសាធារណៈ។
