By នាថ្ងៃអង្គារ ទី១២ ឧសភា លោក វ៉ាង យី រដ្ឋមន្ត្រីការបរទេសចិន បានជំរុញឱ្យប៉ាគីស្ថានបន្តដើរតួនាទីសម្រុះសម្រួល ដើម្បីដោះស្រាយភាពតានតឹងនៅច្រកសមុទ្រ Hormuz ខណៈប៉ាគីស្ថានកំពុងប្រឹងប្រែងរៀបចំកិច្ចចរចាផ្ទាល់លើកទីពីររវាងអាមេរិក និងអ៊ីរ៉ង់។ ការពិភាក្សានេះធ្វើឡើងចំពេលពិភពលោករង់ចាំដំណើរទស្សនកិច្ចរបស់ប្រធានាធិបតី ដូណាល់ ត្រាំ ទៅកាន់ទីក្រុងប៉េកាំង។
ភាគីទាំងពីរបានសង្កត់ធ្ងន់ថា ការរក្សាបទឈប់បាញ់ឱ្យបានយូរអង្វែងរវាងអាមេរិក និងអ៊ីរ៉ង់ គឺចាំបាច់បំផុត រួមទាំងការធានាការធ្វើដំណើរឆ្លងកាត់ច្រកសមុទ្រ Hormuz ដោយរលូន ដែលជាសរសៃឈាមសេដ្ឋកិច្ចដ៏សំខាន់។ លោក វ៉ាង យី បានកោតសរសើរកិច្ចខិតខំប្រឹងប្រែងរបស់ប៉ាគីស្ថាន ដែលធ្លាប់ជួយសម្រុះសម្រួលឱ្យមានបទឈប់បាញ់រយៈពេលពីរសប្តាហ៍កាលពីដើមខែមេសា ប៉ុន្តែការចរចានៅអ៊ីស្លាម៉ាបាដ នៅមិនទាន់ឈានដល់កិច្ចព្រមព្រៀងបញ្ចប់សង្គ្រាមនៅឡើយ។ បច្ចុប្បន្ន ភាគីទាំងពីរកំពុងផ្លាស់ប្តូរលក្ខខណ្ឌគ្នាទៅវិញទៅមក ដើម្បីស្វែងរកចំណុចកណ្តាល ក្នុងបំណងបើកការចរចាជាថ្មី ជួយស្រោចស្រង់ការផ្គត់ផ្គង់ថាមពលពិភពលោក និងជីវភាពប្រជាជនក្នុងតំបន់។
ក្រៅពីនេះ ភាគីទាំងពីរក៏បានពិភាក្សាអំពីការរៀបចំខួបលើកទី ៧៥ នៃទំនាក់ទំនងការទូតរវាងចិន-ប៉ាគីស្ថាន ព្រមទាំងប្តេជ្ញាបន្តកិច្ចសហប្រតិបត្តិការឱ្យកាន់តែជិតស្និទ្ធលើគ្រប់វិស័យ។
