ប៉ាគីស្ថាន បដិសេធដាច់ខាតរឿងលាក់យន្តហោះអ៊ីរ៉ង់ ពីការវាយប្រហាររបស់អាមេរិក

រដ្ឋាភិបាលប៉ាគីស្ថានបានច្រានចោលយ៉ាងដាច់អហង្ការនូវរបាយការណ៍របស់សារព័ត៌មានអាមេរិក CBS News ដែលចោទប្រកាន់ថាខ្លួនបានលាក់យន្តហោះយោធាអ៊ីរ៉ង់នៅក្នុងមូលដ្ឋានទ័ពអាកាសរបស់ខ្លួន ដើម្បីគេចពីការវាយប្រហារតាមអាកាសរបស់អាមេរិក។

ក្រសួងការបរទេសប៉ាគីស្ថានបានចាត់ទុករបាយការណ៍នេះថាជាព័ត៌មានបំភាន់ដែលមានបំណងបង្ខូចកិច្ចខិតខំប្រឹងប្រែងរកសន្តិភាពនៅក្នុងតំបន់។ ប៉ាគីស្ថានបានពន្យល់ថា វត្តមានយន្តហោះទាំងរបស់អ៊ីរ៉ង់ និងអាមេរិកពីមុនមកគឺសុទ្ធតែបម្រើការងារការទូត ដឹកជញ្ជូនមន្ត្រីការទូត និងក្រុមការងារដើម្បីចូលរួមក្នុងកិច្ចពិភាក្សាកាត់បន្ថយជម្លោះរវាងអាមេរិក-អ៊ីរ៉ង់ប៉ុណ្ណោះ។

របាយការណ៍ CBS News បានផ្សាយថា កាលពីចុងខែកុម្ភៈ អាមេរិក និងអ៊ីស្រាអែលបានវាយប្រហារលើអ៊ីរ៉ង់ ដែលបណ្តាលឱ្យមានការសងសឹកគ្នាយ៉ាងខ្លាំងរហូតដល់បិទច្រកសមុទ្រ Hormuz ។ ទោះបីមានការឈប់បាញ់បណ្តោះអាសន្នក្រោមការសម្របសម្រួលរបស់ប៉ាគីស្ថានតាំងពីខែមេសាក្តី ក៏ស្ថានការណ៍នៅតែមិនទាន់ច្បាស់លាស់។

ប៉ាគីស្ថានបញ្ជាក់ថា ខ្លួនគ្រាន់តែជាអ្នកសម្របសម្រួលដ៏ស្មោះត្រង់ មិនលម្អៀងទៅខាងណា ហើយនឹងបន្តដើរតួជាអ្នកនាំសារសន្តិភាព ដោយមិនពាក់ព័ន្ធនឹងកិច្ចការយោធាណាមួយឡើយ៕